Ditari 11.09.2024

Pergatiti: Vera Gojcaj

QEVERIA KËRKON: DEPUTETË PËR LIGJET EKONOMIKE NË 26 SHTATOR

Qeveria e Malit të Zi ka kërkuar mbajtjen e seancës parlamentare për 26 shtator, në të cilën do të vendoset sërish për një sërë ligjesh ekonomike që presidenti i shtetit, Jakov Millatoviq, i ktheu në Kuvend. Kjo është konfirmuar për Portalin RTMZ.
Presidenti malazez Jakov Millatoviq ka kthyer në Parlamentin e Malit të Zi tre ligjet ekonomike të nevojshme për zbatimin e programit “Europe Tani 2” të koalicionit qeverisës, i cili së fundmi është miratuar nga parlamenti. Bëhet fjalë për ligjet për TVSH-në dhe akcizat, si dhe ligji për kontributet për sigurimet social të detyrueshme.
Kështu Millatoviq vazhdoi t'i kthejë në Kuvend, për rivendim, ligjet që ai mendon se mund ta dëmtojnë Malin e Zi, të cilat nuk janë në përputhje me Kushtetutën dhe ligjet e BE-së. Kuvendi miratoi së fundmi një sërë ligjesh ekonomike që janë të nevojshme për fillimin e zbatimit të programit ” Europa tani 2”, i cili parashikon rritje të pagave për të gjithë punonjësit në Mal të Zi.

KRYETARI I KUVENDIT KA ANULUAR SEANCËN E NESËRME

Kryetari i Parlamentit të Malit të Zi, Andrija Mandiq ka anuluar mbledhjen e seancës së dhjetë të jashtëzakonshme në vitin 2024, e cila ishte caktuar për 12 shtator në ora 12:00.
Mandiq e bëri këtë me kërkesë të dyzet e një deputetëve, të cilët, ndër të tjera, ishin iniciator të kërkesës për mbajtjen e seancës së dhjetë të jashtëzakonshme në vitin 2024.

KRAPOVIQ: NE KONTRIBUOJMË MAKSIMALISHT NË PËRFUNDIMIN E INTEGRIMIT NË BE

Të gjitha subjektet politike do të kontribuojnë maksimalisht në përfundimin e suksesshëm të integrimeve evropiane, tha ministri i Mbrojtjes Dragan Krapoviq me ambasadorin e Bashkimit Evropian në Mal të Zi, Johan Satler.
“Kjo Qeveri mbetet e përkushtuar për realizimin e qëllimit kryesor të politikës së jashtme – anëtarësimit të plotë në Bashkimin Evropian, pasi që është një prioritet i pranuar përgjithësisht në Mal të Zi”, tha Krapoviq.
Krapoviq pret që procesi i zgjerimit të jetë në krye të agjendës së administratës së re evropiane.
"E ardhmja evropiane është garanci e paqes dhe stabilitetit në Ballkanin Perëndimor. Mali i Zi e ka harmonizuar politikën e tij të jashtme me politikën e jashtme dhe të sigurisë të Bashkimit dhe do të vazhdojë të kontribuojë në misionet dhe operacionet nën kujdesin e BE-së", përfundoi Krapoviq.

KOMUNA E ANDRIEVICËS DO TË DALË NGA KRIZA E GJATË POLITIKE

Me seancën e sotme të Kuvendit Komunal, komuna e Andrievicës do të dalë nga kriza e gjatë politike. Mandati i Këshillit të të besuarve të Qeverisë i cili menaxhoi këtë qytet që nga marsi i vitit të kaluar, përfundon. Bashkëbiseduesi për portalin e Radiotelevizionit të Mali të Zi ka deklaruar se pastaj mbet një afat prej tridhjetë ditësh që kryetari aktual Zhelko Qulafiq përsëri të zgjidhet kryetar. Ai, nga ana tjetër, beson se ky dhe të gjitha funksionet e përhershme të dakorduara do të shpërndahen në një periudhë më të shkurtër. “Në këtë moment më e rëndësishmja është që patjetër të kemi 16 këshilltarë dhe Partia Demokratike e Socialistëve të mbetet në opozitë. U la dera e hapur tre këshilltarëve nga lista qytetare ‘Për të ardhmen e fëmijëve tanë’ që të mendojnë nëse duan të na bashkohen apo do të mbeten në opozitë”, tha bashkëbiseduesi për portalin. Komuna do të ketë edhe dy nënkryetarë: Miodrag Gjukiq nga Fronti Demokratik, dhe tjetri nga "Lëvizja Evropa Tani", emri i të cilit ende nuk është përcaktuar.

ÇARAPIQ: “EVROPA TANI 2” DO TË MUNDËSOJË SHLYERJEN MË TË LEHTË TË KREDIVE PËR BANESA

Rritja e pagave në kuadër të programit “Evropa tani 2” do ta bëjë më të lehtë shlyerjen e kredive për banesa për qytetarët që kanë blerë më parë apartamente, ka bërë të ditur kryetari i Klubit të Deputetëve Evropa tani, Vasilije Carapiq.
“Të ardhurat e tyre do të rriten, dhe këstet e tyre të kredisë do të mbeten të njëjta, gjë që
është një kontribut i drejtpërdrejtë në përmirësimin e buxhetit të tyre familjar”, ​​tha Çarapiq në një deklaratë.
Ai shtoi se diferenca në çmimin mesatar të një metri katror të banesës në Podgoricë krahasuar me vitin 2020 është 82 për qind, ndërsa në të njëjtën periudhë paga minimale është rritur mesatarisht për 215 për qind, ndërsa mesatarja edhe për 100 për qind.
“Kjo do të thotë se rritja e pagave ka qenë më e madhe se rritja e çmimit të një metër katror të banesës”, ka thënë Çarapiq.
Ai tha se bie në ujë teza se programi Evropa tani ka çuar në rritjen e çmimit të një metri katror të një apartamenti.

MARKOVIQ: NE NUK KEMI NEVOJË PËR NJË QEVERI QË NUK MBRON REPUTACIONIN DHE DINJITETIN E SHTETIT

Mali i Zi nuk ka nevojë për një qeveri që nuk ruan reputacionin dhe dinjitetin e vendit, tha kryetari i Partisë së Progresit Evropian, Dushko Markoviq.
Markoviq tha dje se Qeveria e ka njoftuar opinionin për vizitën ndërshtetërore të zëvendëskryeministrit Budimir Aleksiq në Serbi, e cila ishte një tjetër poshtërim shtetëror.
“Nuk është vetëm se nuk theksohen simbolet kombëtare të shtetit të Malit të Zi, por është edhe një sulm i rëndë ndaj sovranitetit të tij”, ka thënë Markoviq në një deklaratë për mediat. Siç ka thënë ai, Aleksiq ka njoftuar opinioni se e gjithë krijimtaria kulturore dhe çdo krijimtari tjetër në Mal të Zi është zhvilluar në gjuhën serbe.
“Kjo në thelb nuk është e vërtetë. “Mali i Zi është një shtet civil”, tha Markoviq.
Ai vuri në dukje se identitete të ndryshme kombëtare, fetare, kulturore dhe gjuhësore ekzistojnë në mënyrë të barabartë në Mal të Zi.
“Mali i Zi nuk ka nevojë për një qeveri që nuk mbron reputacionin dhe dinjitetin e tij. Prandaj besoj se më 29 shtator në Podgoricë do të fillojmë procesin e ndërrimit të një qeverie të tillë”, tha Markoviq.

MILLOVAC: VJEDHJA E DEPOS SË GJYKATËS SË LARTË NUK ËSHTË THJESHT NJË VJEDHJE, POR NJË VEPËR PENALE

Çështja e tunelit që u hap në depon e Gjykatës së Lartë tregon pse ende nuk mund të flasim për një drejtësi të reformuar dhe të aftë për të trajtuar çështjet më të rëndësishme në vend, tha Drejtori i Qendrës Kërkimore MANS, Dejan Millovac në një intervistë për Portalin e Radiotelevizionit të Malit të Zi. “Fakti që ende nuk i kemi identifikuar autorët e kësaj vepre penale përkon plotësisht me mënyrën se si funksionon gjyqësori malazez, i cili në tre dekadat e fundit ka qenë i dominuar nga ekzekutorët, ndërsa ata pothuajse gjithmonë i kanë shpëtuar drejtësisë”, thotë Millovac. Ai shton se vjedhja e depos së Gjykatës së Lartë nuk është thjesht një vjedhje, por një vepër penale e kryer me qëllim komprometimin e provave në rastet e korrupsionit të lartë dhe krimit të rëndë të organizuar.

SEKTORI DETAR DUHET TË VALORIZOHET

Ministria e Detarisë dhe Shoqata e transportuesve kanë hapësirë për bashkëpunim, është bërë e ditur pas takimit të ministrit Filip Radulloviq me drejtorin e Shoqatës së transportit Matej Zakonjshek. Radulloviq e njohu drejtorin e Shoqatës së Transportit me planet e departamentit që ai drejton, duke theksuar ndryshimin e rregulloreve ligjore që do të garantojnë sigurinë në det, por edhe ruajtjen më të mirë të mjedisit dhe standardeve ekologjike. Matej Zakonjshek, theksoi rëndësinë e sektorit detar, i cili ka një potencial që duhet valorizuar. Bashkëbiseduesit ranë dakord se është e nevojshme të investohet në infrastrukturën detare malazeze. Në veçanti janë theksuar projektet që do të kontribuojnë në modernizimin e kapaciteteve detare. Në takim u ra dakord që vitin e ardhshëm Ministria e Detarisë dhe Shoqatës se Transportit bashkërisht ta shënojnë Ditën Evropiane të Detit me aktivitete të përbashkëta në Mal të Zi.

PAKETA E RE E FINANCIMIT TË BERZH PËR ALTER MODUS

Banka Evropiane për Rindërtim dhe Zhvillim (BERZH) do të sigurojë financim për institucionin financiar të mikro-kredive Alter Modus në kuadër të tre projekteve në vlerë totale prej dhjetë milionë euro. BERZH tha se mbështetje kreditore deri në katër milionë euro do të sigurohet përmes Kornizës Ndërmjetësuese Financiare të BERZH-it (FIF). “Përmes kësaj linje, BERZH do të vazhdojë të mbështesë partnerin afatgjatë dhe të mirë-menaxhuar Alter Modus, i cili fokusohet në ndërmarrjet e vogla dhe të mesme (SME) ,si dhe përkrahjen e pamjaftueshme te tyre”, thuhet në njoftim. Siç thanë ata, në kuadër të Programit për Punësimin e të Rinjve në Ballkanin Perëndimor do të sigurohet mbështetje kreditore deri në dy milionë euro. “Programi kryesor i BERZH-it, Rinia në Biznes, ka për qëllim kreditimin e mëtejshëm të kompanive që zotërohen ose menaxhohen nga sipërmarrës nën moshën 35 vjeç”, tha BERZH.

NGRIHET AKTAKUZË NDAJ 45 PERSONAVE PËR SULMIN NË BANJSKË

Prokuroria Speciale e Kosovës ka ngritur aktakuzë për sulmin e 24 shtatorit në Banjskë të Zveçanit, ku mbeti i vrarë polici Afrim Bunjaku. Aktakuza u ngrit rreth një vit pas sulmit në Banjskë. Kryeprokurori i Prokurorisë Speciale, Blerim Isufaj, tha se aktakuza është ngritur ndaj 45 personave."Prokuroria Speciale ka punuar intensivisht duke zhvilluar hetime në këtë rast shumë kompleks. Pas grumbullimit të gjitha provave dhe analizimit të tyre, sot kemi ngritur aktakuzë kundër 45 të pandehurve. Për ta ngritur aktin na u është dashur të presim gjatë, ndoshta edhe një vit. Pranimi i rezultateve të ekzaminimeve që janë kryer jashtë vendit, ishte shkaku kryesor i vonimit të ngritjes së aktakuzës", shtoi ai.Në orët e para të 24 shtatorit të 2023-tës, në fshatin Banjskë të Zveçanit, policia kishte vërejtur se ishin vendosur dy kamionë me anë të cilëve ishte bllokuar rruga.Gjatë ndërhyrjes së policisë, grupi kriminal serbë kishte shtënë në drejtim të Policisë së Kosovës, me ç’rast ishte vrarë polici Afrim Bunjaku, si dhe ishte plagosur zyrtari policor, Alban Rashiti.

KURTI: VIZITAT NË VERI KUNDËR ASKUJT - NJOHJE E NEVOJAVE TË QYTETARËVE

Kryeministri i Kosovës Albin Kurti, në mbledhjen e Qeverisë ka thënë se vizita e djeshme në veri nuk është kundër askujt, por përkundrazi është domosdoshmëri për kuptimin e nevojave të qytetarëve. “Vizitat tona të zyrtarëve shtetëror në këto komuna nuk janë kundër askujt, ato janë të domosdoshme për të kuptuar nevojat që këto komuna i kanë, pasi të kemi lënë anash çfarëdo paragjykimi për të cilën qeveria jonë angazhohet nga dita e parë. Pikërisht për t’i flakur paragjykimet e ndërsjella dhe për të parë se sa anash janë lënë qytetarët atje, ne po i bëjmë këto vizita pune”, ka thënë ai për vizitën në fshatrat e Leposaviqit dhe komunën e Mitrovicës së Veriut. Kurti tha edhe se në veri të vendit qeveria nuk po mbyll, por po hap zyre të cilat ofrojnë shërbime të ligjshme.

ELISA SPIROPALI U PRIT NGA KRYETARI I KUVENDIT TË KOSOVËS, GLAUK KONJUFCA

Kryetari i Kuvendit të Kosovës, Glauk Konjufca, ka pritur në takim ,homologen e tij, kryetaren e Kuvendit të Republikës së Shqipërisë, Elisa Spiropali. Pas takimit të dy do të dalin bashkë në një konferencë për media. Kryeparlamentarja e Shqipërisë, do ta takojë pastaj edhe kryeministrin e vendit. Spiropali, pas marrjes së pozitës së Kryetares së Kuvendit të shtetit shqiptar, e ka vizitën e parë në këtë pozitë jashtë vendit. Ajo në fillim të takimit duke u përshëndetur nga Konjufca, ka thënë se shteti shqiptar do të vazhdoj ta ruaj këtë traditë, që i pari i kuvendit, vizitën e parë në këtë post, ta bëjë në shtetin e Kosovës, aty ku ndihen si në shtëpinë e tyre.

HARRIS DHE TRUMP KRITIKOJNË QËNDRIMET POLITIKE TË NJËRI-TJETRIT NË DEBATIN E TYRE TË PARË

Debati i parë mes kandidates demokrate për presidente Kamala Harris dhe rivalit të saj republikan Donald Trump u shoqërua me polemika luftarake mbi ekonominë, emigracionin, abortin, kujdesin shëndetësor dhe politikën e jashtme, njofton Zëri i Amerikës. Derisa Harris kritikoi synimin e Trumpit për të vendosur tarifa të larta ndaj mallrave të huaja, foli mbi planin e saj për të ofruar përfitime tatimore për familjet amerikane dhe bizneset e vogla. Kurse Trump kritikoi Harris për inflacionin e lartë gjatë mandatit të administratës së Presidentit Biden, megjithëse ai e mbivlerësoi nivelin e rritjes së çmimeve. Kandidatët gjithashtu shkëmbyen kritika për luftën mes Hamasit dhe Izraelit në Rripin e Gazës, si dhe agresionin rus në Ukrainë, megjithëse asnjëri nuk ofroi plane specifike për zgjidhjen e këtyre konflikteve. Ky mund të jetë debati i vetëm mes tyre në fushatën për zgjedhjet presidenciale të 5 nëntorit.

SULMET E FUNDIT IZRAELITE NË GAZA PO KONSIDEROHE SI "3 MASAKRA"

Në sulmet që ushtria izraelite ka kryer në 24 orët e fundit ndaj zonave të ndryshme të Gazës janë vrarë 32 palestinezë ndërsa 100 të tjerë janë plagosur, të cilat po konsiderohet si "3 masakra". Gjithashtu në njoftim thuhet se nën rrënoja dhe përreth rrugëve ende ka kufoma të të vrarëve ndërsa ekipet shëndetësore dhe të Mbrojtjes Civile nuk kanë mundur të mbërrijnë tek trupat për shkak të pengesave nga forcat izraelite.

RUSIA PARALAJMËRON SHBA: NËSE UKRAINA NA GODET ME RAKETAT TUAJA, DO JENI PALË NË KONFLIKT

Rusia ka bërë të ditur se do t'i konsiderojë Shtetet e Bashkuara dhe aleatët e saj si palë në luftën në Ukrainë dhe Moska do të përdorë armë më të fuqishme nëse Perëndimi i lejon Ukrainës të përdorë armë me rreze të gjatë për sulme brenda territorit rus. “Uashingtoni dhe shtetet e tjera evropiane po bëhen palë në luftën në Ukrainë”, tha për Telegram Vyacheslav Volodin, kryetari i Dumës së Rusisë, dhoma e ulët e parlamentit. Volodin thotë se Shtetet e Bashkuara, Gjermania, Franca dhe Britania po bëhen palë në konflikt. Ndërkaq, më herët, SHBA ka lënë të kuptohet se mundë të heqë kufizimet ndaj Ukrainës dhe të lejojë përdorimin e raketave amerikane me rreze të gjatë veprimi kundër Rusisë.

IRANI ZOTOHET PËR PËRGJIGJE “PROPORCIONALE” PAS SANKSIONEVE

Nga Republika e Iranit kumtuan se do të përgjigjet në mënyrë “simetrike dhe proporcionale” pasi Britania e Madhe, Franca dhe Gjermania i anuluan marrëveshjet për shërbime ajrore me Teheranin dhe u zotuan se do ta sanksionojnë kompaninë e saj ajrore, Iran Air. Treshja evropiane, e njohur si E3, njoftoi përmes një komunikate se ka ndërmarrë masa pasi konfirmoi se Irani kishte transferuar raketa balistike në Rusi. Ndërkohë edhe Shtetet e Bashkuara të Amerikës vendosën sanksione ndaj 10 individëve dhe gjashtë subjekteve me bazë në Iran dhe në Rusi, përfshirë ndaj Iran Air, për furnizimin e dyshuar me raketa balistike. Zëdhënësi i Ministrisë së Jashtme të Iranit, Nasser Kanani, tha se këto akuza janë “plotësisht të rrejshme dhe të pabaza”.

PËRMBYTJE E STUHI NË VIETNAM,  RRITET NË 141 NUMRI I TË VDEKURVE

Një përmbytje rrëmbeu një fshat të tërë në Vietnamin verior, ku humbën jetën 22 njerëz dhe duke lënë dhjetëra të zhdukur, ndërsa tajfuni që goditi këtë vend shkaktoi  vdekjen e141personave. Transmetuesi shtetëror vietnamez VTV njoftoi se ekipet e shpëtimit kanë gjetur 22 trupa dhe po vazhdojnë kërkimet për rreth 70 të tjerë. Numri i të vdekurve nga tajfuni Yagi dhe pasojat e tij është rritur në 141. 69 persona të tjerë janë të zhdukur dhe qindra u plagosën, njofton Transmetuesi shtetëror vietnamez. Yagi ishte tajfuni më i fortë që goditi vendin e Azisë Juglindore në dekada. Ai arriti në tokë të shtunën me erëra deri në 149 km/h dhe pavarësisht dobësimit.

TUZ: PANAIRI I LIBRIT

Komuna e Tuzit tradicionalisht organizon Panairin e librit, një ngjarje që mbledh së bashku autorë të njohur, përfshirë edhe ata që shkruajnë për fëmijë, duke ofruar një mundësi për të gjithë dashamirësit e librit. Aktiviteti përfshin promovime të librave të rinj, ku pjesëmarrësit mund të njihen me botimet më të fundit. Panairi i pestë, që hapet sonte në Qendrën Kulturore Informative "Malesia" dhe do të zgjasë deri më 14 shtator. Hapja zyrtare do të bëhet nga kryetari i Komunës, Lindon Gjelaj, dhe organizatorja Marina Ujkaj, sekretare e Sekretariatit për Vetëqeverisje Lokale. Më pas, në ora 20:00, do të promovohet vepra e Ndre Mjedës.

NESËR MOT I VRANËT DHE ME RESHJE TË SHIUT

Në pjesët jugore dhe qendrore të Malit të Zi mban mot kryesisht me diell, vende- vende me vranësira të pakta deri mesatare , kurse në veri, vende- vende me vranësira mesatare . Frynë erë e dobët deri mesatare nga drejtime të ndryshme .
Temperaturat e shënuara në orën 14: Herceg Novi e Budvë 29 g, Podgoricë 28, Tivar e Ulqin 27, Cetinë 24, Nikshiq 23, Plluzhinë 21, Plevle, Kollashin, Petnjicë e Shavnik 20, Beranë e Guci 19, Bjello Pole e Andrivicë 18, Rozhajë 16 dhe në Zhablak 14 g.

Nesër gjatë ditës pritet mot me vranësira, të cilat pasdite do të shkaktojnë reshje shiu në zonat jugore dhe qendrore, dhe të cilat gjatë natës do të përhapen në pjesën tjetër të vendit. Gjatë natës priten reshje më intensive, vende-vende reshje shiu dhe bubullima. Do të fryjë erë jugore me rritje graduale, herë pas here mesatare deri e fortë. Temperatura e mëngjesit do të jetë nga 8 deri në 20, kurse temperatura më e lartë ditore prej 19 deri në 28 gradë.