Ditari 12.09.2024

Ditarin e përgatiti Marash Dedvukaj

Policia Speciale mëngjesin e sotëm ka arrestuar disa persona

Policia Speciale me urdhër të Prokurorisë Speciale Shtetërore, mëngjesin e sotëm ka arrestuar disa persona. Të arrestuarit janë anëtarë të grupeve të organizuara kriminale dhe gjatë ditës pritet të shoqërohen në selinë e Policisë Speciale. Për shkak të arrestimit të anëtarëve të klanit mafioz, mëngjesin e sotëm janë bllokuar disa rrugë në Budvë.

Sipas “Vijestit”, oficerët e Policisë Speciale kanë arrestuar 42-vjeçarin Davor Kordiq nga Budva, i cili dyshohet se i përket një klani kriminal kundër të cilit ka nisur hetimi i Prokurorisë Speciale Shtetërore. Me urdhër të Prokurorisë Speciale është arrestuar edhe Aleksandar Sasha Qetkoviq. Ai është vëllai i të ndjerit Mirosllav Qetkoviq, i cili u vra në fillim të janarit të vitit 2017 para kafenesë “Poco” në Budvë.

Ministria e Drejtësisë do të bëjë përpjekjet maksimale për të përmbushur të gjitha kërkesat e kapitujve bashkëbisedues

Ministria e Drejtësisë do të bëjë përpjekjet maksimale për të përmbushur të gjitha kërkesat e kapitujve bashkëbisedues 23 dhe 24, në mënyrë që të plotësohet një nga kushtet kryesore që Mali i Zi të bëhet anëtar i plotë i BE-së deri në vitin 2028. Ky është prioriteti kryesor i politikës së jashtme dhe detyra kryesore e Malit të Zi, tha ministri i Drejtësisë Bojan Bozhoviq gjatë takimit me ambasadorin e sapoemëruar të Republikës së Austrisë, Kristian Steiner. Bozhoviq dhe Shtajner vlerësuan se IBAR-i pozitiv është vetëm hapi i parë kur bëhet fjalë për finalen e procedurës së anëtarësimit, dhe se pjesa më e vështirë dhe më konkrete e punës është përpara, pra reforma e plotë sistemit.

Diplomatët e 27 vendeve anëtare të BE në Mal të Zi

Diplomatët e 27 vendeve anëtare të Bashkimit Evropian, anëtarë të grupit punues të Këshillit të BE-së për zgjerim, qëndrojnë në një vizitë dyditore në Mal të Zi. Gjatë vizitës ata do të takohen me zyrtarë shtetërorë dhe përfaqësues të institucioneve kryesore, të ngarkuara për anëtarësimin e vendit në BE, si dhe me përfaqësues të shoqërisë civile.

Ambasadori i sapoemëruar i BE-së në Mal të Zi, JOHAN SATLER, tha se kjo është vizita e parë e madhe vetëm pak ditë pas fillimit të mandatit të tij. Me rastin e vizitës së zyrtarëve evropianë, ai shpjegoi se bëhet fjalë për diplomatët që janë në krye të procesit të zgjerimit, të cilët mbikëqyrin procesin e anëtarësimit të Malit të Zi në Bashkim Evropian dhe monitorojnë progresin në rrugën e reformave, por edhe cilësinë e ligjeve dhe rregulloreve.

M.Banoviq - Mali i Zi vazhdon të përballet me ndikime të huaja që cenojnë proceset e tij demokratike dhe integrimin në BE

Mali i Zi vazhdon të përballet me ndikime të huaja që cenojnë proceset e tij demokratike dhe integrimin në Bashkimin Evropian (BE), u njoftua në konferencën e Qendrës Dixhitale të Forenzikës (DFC), dhe u tha se lufta kundër këtyre ndikimeve kërkon bashkëpunim të gjerë. Analisti i DFC-së Marko Banoviq tha se në një kohë kur manipulimi i informacionit, revizionizmi historik dhe politikat nacionaliste shërbejnë si mjete kyçe të aktorëve të huaj në përpjekje për të formësuar vendimet politike dhe drejtimin e shtetit, Mali i Zi ka treguar një cenueshmëri të veçantë ndaj kërcënimeve hibride. Këto sulme, tha ai, minojnë zhvillimin demokratik, karakterin qytetar dhe orientimin properëndimor. “Fatkeqësisht, vëllimi dhe shpeshtësia e tregimeve të dezinformatave janë bërë aq të mëdha sa që shumë prej tyre tashmë janë pranuar në shoqërinë tonë”, tha Banoviq.

Ministria e Arsimit, Shkencës dhe Inovacionit (MPNI) ka ngritur kallëzim penal ndaj dy personave

Ministria e Arsimit, Shkencës dhe Inovacionit (MPNI) ka ngritur kallëzim penal ndaj dy personave nën dyshimin se kanë kryer veprën penale të falsifikimit të dokumenteve. Siç njofton MPNI, në procesin e njohjes së dokumenteve të huaja arsimore për arsimin e mesëm të fituar, shkollat ​​e mesme kompetente kanë konstatuar se D.M. dhe M.S. ka paraqitur dokumente publike që nuk janë të besueshme. “Në bazë të kësaj, dyshohet me arsye se D.M dhe M.S kanë kryer veprën penale të falsifikimit të një dokumenti nga neni 412 i Kodit Penal”, thuhet në njoftim. Ministria tha se presin që organet kompetente të veprojnë në përputhje me kompetencat tyre, në mënyrë që të zgjidhet një problem i rëndësishëm institucional.

Kurti për aktakuzën për sulmin në Banjskë: Më mirë vonë se kurrë

Kryeministri i Kosovës, Albin Kurti, ka folur për ngritjen e aktakuzës nga Prokuroria Speciale për sulmin në Banjskë. Kryeministri i vendit ka thënë se ende nuk e ka parë aktakuzën, por, ai është shprehur i bindur se aktakuza ka mundur të ngrihet shumë më herët. “Nuk e kam parë ende aktakuzën, por jam i bindur që ka mundur të ngritet shumë më herët dhe sot të ndodhemi në një situatë të re. Por siç thotë populli më mirë vonë se kurrë. Duhet ta shohim përmbajtjen e saj. Ajo që ne insistojmë vazhdimisht kudo që ndodhemi, e kam thënë edhe në Bruksel herën e fundit që isha, që Radoiçiqi duhet t’i dorëzohet autoriteteve të Kosovës sepse krimin e ka kryer në Kosovë, Banjska është në Zveçan të Kosovës”, ka thënë Kurti. Kurti ka insistuar që duhet të dorëzohet kryekrimineli serb, Milan Radojiçiq, pasi akti është kryer në Republikën e Kosovës. Dje Prokuroria Speciale e Kosovës ka ngritur aktakuzë për 45 persona të përfshirë në sulmin e Banjskës të Zveçanit.

BE përshendet ngritjen aktakuzës për sulmin në Banjskë

Bashkimi Evropian ka përshëndetur ngritjen e aktakuzës nga Prokuroria Speciale e Kosovës për sulmin e vitit të kaluar në Banjskë. Zëdhënësi i BE-së, Peter Stano konfirmoi se për masat eventuale për shkak të kësaj ngjare do të mendohet pas përfundimit të të gjitha procedurave. “Ne kemi thënë që nga muaji shtator i vitit të kaluar se ky sulm përbënte një përshkallëzim të qartë dhe të paprecedentë. Pra, kur gjykata në Kosovë të vendosë se kush është fajtor, kush është përgjegjës apo i pafajshëm, atëherë do të jetë koha për të marrë pasoja. Sigurisht se ne kemi një spektër të gjerë instrumentesh që mund t'i përdorim në konsultim me shtetet anëtare. Tani filluan procedurat gjyqësore. Është shumë e rëndësishme që hetimi është përfunduar nga prokuroria e Kosovës dhe tani gjykata duhet të vërtetojë nëse konkluzionet e këtij hetimi janë të kënaqshme dhe të shpallë një aktgjykim. Pra, ne do të vëzhgojmë këto procedura në vazhdim dhe presim që të gjithë të bashkëpunojnë në masën e nevojshme”, deklaroi Stano.

OEAK: Qeveria të përmbahet, të mos përjashtohet Kosova nga nismat rajonale

Oda Ekonomike Amerikane në Kosovë i vlerëson si shqetësuese paralajmërimet e ditëve të fundit lidhur me mundësinë e përjashtimit të Kosovës nga nismat e bashkëpunimit rajonal për shkak të qasjes aktuale. "Duke përsëritur thirrjen e saj ndaj Qeverisë së Republikës së Kosovës për shfuqizim të masës që pengon lëvizjen e lirë të mallrave nga shtetet anëtare të marrëveshjes CEFTA, Oda Amerikane thekson se një masë e tillë rrezikon jo vetëm të arriturat e shënuara përgjatë viteve, por kërcënon prospektet e ardhshme të Kosovës, të cilat do të rezultonin nga bashkëpunimi ekonomik",thekson OEAK. Oda Amerikane rithekson se marrëdhëniet e mira fqinjësore janë parakusht për realizimin e aspiratave për integrim euro-atlantik, ndërsa qasja aktuale e cila mund të çojë në izolim ekonomik e politik, do të sillte pasoja të paparashikueshme për Kosovën, rritjen ekonomike dhe mirëqenien e qytetarëve, aq më tepër që paralajmërimet e tilla nuk duhet të shihen si retorikë boshe, meqë tashmë Kosova është duke u ballafaquar me masa ndëshkuese nga Bashkimi Evropian, të cilat rezultojnë në mundësi të humbura të zhvillimit ekonomik dhe përparimit social. Oda Amerikane përsërit qëndrimin e saj se këto sfida duhet të adresohen përmes mekanizmave të paraparë në kuadër të aranzhimeve për tregti të lirë dhe përmes dialogut të hapur dhe konstruktiv", thuhet në reagim.

Orbani e pret Dodikun në takim në Budapest

Kryeministri i Hungarisë, Viktor Orban, bisedoi me presidentin e Republikës Sërpska të Bosnje e Hercegovinës, Millorad Dodik, gjatë një takimi në Budapest. Ata biseduan për “integrimin e Ballkanit Perëndimor në Bashkimin Evropian (BE) dhe se si Hungaria, si kryesuese e Këshillit të BE-së, mund ta përmirësojë këtë proces”, tha zëdhënësi për media i zyrës së kryeministrit hungarez, Bertalan Havasi. Ndërkohë, Orbani shkroi në rrjetin social X se takimi i tij me Dodikun ishte “në shërbim të thellimit të stabilitetit të Bashkimit Evropian”. Në vend të leksioneve dhe sanksioneve, ne besojmë në dialog dhe bashkëpunim. Takimi im sot me presidentin Millorad Dodik i shërbeu këtij qëllimi", shkroi Orban. Orbani është një nga aleatët kryesorë të presidentit prorus të entitetit serb të Bosnjës dhe një nga liderët e paktë të BE-së që janë të gatshëm të takohen me të. Në fillim të këtij viti, Dodiku ia dha Viktor Orbanit çmimin “Urdhri i Republikës Sërpska” në një ceremoni në Banja Llukë. Të gjithë presidentët e mëparshëm të Serbisë, si dhe kreu i Kishës Ortodokse Serbe dhe pesë personat e dënuar për krime lufte para Gjykatës Penale Ndërkombëtare në Hagë, përfshirë ish-udhëheqësin serb të Bosnjës Radovan Karaxhiq dhe ish-komandantin e Ushtrisë së Republikës Sërpska, Ratko Mlladiq, janë shpërblyer me këtë çmim. Dodik, këtë çmim ia ka dhënë edhe presidentit rus Vladimir Putin vitin e kaluar. Dodig është i sanksionuar nga Shtetet e Bashkuara dhe Britania e Madhe për shkak të përpjekjeve të tij për ta minuar marrëveshjen për paqe Dejton, e cila i dha fund luftës së Bosnjës në vitet e 90. Qeveria hungareze vuri veton ndaj sanksioneve të BE-së kundër Dodikut.

OKB-ja thotë se gjashtë punëtorë të saj u vranë nga një sulm izraelit në Gazë

Agjencia e Kombeve të Bashkuara për refugjatët palestinezë, UNRWA, ka thënë se gjashtë punonjës të saj janë vrarë nga një sulm ajror izraelit në njërën prej shkollave që i udhëheq ajo në Gazën qendrore. Zëdhënësi i Mbrojtjes Civile të Gazës, Mahmud Bassal, tha se 18 njerëz janë vranë dje nga sulmi në shkollën al-Jaouni, në kampin e refugjatëve Nuseirat, i cili po përdoret si strehimore për mijëra palestinezë të zhvendosur. Ushtria izraelite thotë se kreu një “sulm preciz ndaj terroristëve” që planifikonin sulme nga shkolla, dhe se kishte marrë masa për ta shmangur dëmtimin e civilëve. Sekretari i Përgjithshëm i Kombeve të Bashkuara, Antonio Guterres, tha se ky sulm përbën “shkelje dramatike të ligjit ndërkombëtar humanitar”. Hamasi – i cili është shpallur organizatë terroriste nga Shtetet e Bashkuara dhe Bashkimi Evropian – e mohon se i përdor shkollat dhe zonat civile për qëllime ushtarake. Izraeli e ka nisur luftën në Gazë si hakmarrje ndaj sulmeve të Hamasit në tokën izraelite më 7 tetor, në të cilat militantët kanë vrarë 1.200 njerëz dhe kanë marrë peng 240 të tjerë. Si pasojë e fushatës ushtarake tokësore dhe ajrore të Izraelit, në Gazë janë vrarë më shumë se 41.000 palestinezë, kryesisht gra dhe fëmijë, sipas autoriteteve shëndetësore palestineze.

Së paku 14 të plagosur nga sulmet ruse në verilindje të Ukrainës

Forcat ruse e kanë sulmuar qytezën Konotop në rajonin Sumi në verilindje të Ukrainës mëngjesin e sotëm, duke i plagosur 14 njerëz, sipas zyrtarëve vendës. Infrastruktura civile dhe objektet energjetike ishin në shënjestër të sulmeve, sipas tyre. Kryetari i Konotopit, Artem Semenikhin, shkroi në Telegram se së paku një person ra në koma pas sulmeve. Kryetari njoftoi se pjesë të qytezës kanë mbetur pa rrymë si pasojë e prishjeve në rrjet pas sulmeve. Ai tha se po punohet për ta kthyer furnizimin me rrymë dhe ujë, pas dëmeve të mëdha në infrastrukturën energjetike. Administrata ushtarake e rajonit tha se Rusia përdori dronë kamikazë të tipit Shahed gjatë këtyre sulmeve. Rusia e ka goditur në mënyrë sistematike infrastrukturën energjetike të Ukrainës, duke i shkaktuar dëme të jashtëzakonshme, gjë që e ka kufizuar furnizimin e banorëve me rrymë dhe ka shkaktuar reduktime të vazhdueshme. Ndërkohë, Ukraina është përgjigjur duke kryer sulme me dronë thellë brenda Rusisë, ku ka dëmtuar objekte të energjisë që janë vendimtare për ushtrinë ruse, kryesisht depo të naftës. Këto sulme ndodhën pak orë pasi sekretari amerikan i Shtetit, Antony Blinken, dhe homologu i tij britanik, David Lammy, u larguan nga Ukraina pas takimeve me zyrtarët ukrainas në Kiev gjatë një vizite të përbashkët, ku njoftuan ndihmë të re për Ukrainën.

Raportohet se Britania i ka dhënë leje Ukrainës për sulme thellë brenda Rusisë

Britania e Madhe i ka dhënë leje Ukrainës, mbrapa dyerve të mbyllura, që t’i përdorë raketat e saj me rreze të gjata veprimi për të kryer sulme thellë brenda tokës ruse, raportojnë mediat britanike. Sipas gazetës Guardian, burimet qeveritare kanë thënë se është marrë tashmë vendimi për ta lejuar Kievin t’i përdorë raketat lundruese të prodhuara nga Britania, Storm Shadow, për sulme brenda Rusisë, megjithëse vendimi nuk është bërë publik dhe me gjasë nuk do të bëhet publik as në të ardhmen. Zyrtarët britanikë nuk e kanë komentuar raportimin e Guardianit. Presidenti i Ukrainës, Volodymyr Zelensky, ka kohë që u bën thirrje vendeve të Perëndimit t’i heqin kufizimet ndaj vendit të tij për përdorimin e armëve me rreze të gjata veprimi për sulme thellë brenda Rusisë. Të martën, presidenti i Shteteve të Bashkuara, Joe Biden, tha se administrata e tij është duke punuar për ta gjetur një mënyrë për heqjen e këtyre kufizimeve.

Koreja e Veriut teston raketa balistike

Koreja e Veriut ka shkrepur sot disa raketa balistike, me rreze të shkurtra veprimi, pranë bregdetit të saj lindor, njoftoi ushtria e Koresë së Jugut. Ky ishte testimi i parë raketor i Veriut pas më shumë se dy muajve dhe u krye vetëm pak ditë pasi lideri verikorean Kim Jong Un u zotua për ta rritur arsenalin bërthamor. Raketat u lëshuan nga Peniani dhe fluturuan rreth 360 kilometra para se të binin në det, tha Shtabi i Përgjithshëm i ushtrisë jugkoreane, pa treguar sa sosh u shkrepën saktësisht. “Ne e dënojmë fuqishëm lëshimin e raketave nga Koreja e Veriut, sepse ky është provokim i qartë që e kërcënon seriozisht paqen dhe stabilitetin në Gadishullin Korean”, tha ai në një komunikatë.

Për nesër pritet mot me vranësira mesatare dhe kohë pas kohe me reshje të shiut

Sot në Mal të Zi ka mbajt mot me diell dhe vende vende me vranësira kalimtare. Frynë erë e mesme e vende vende deri e fortë nga drejtimet e jugut.
Temperaturat në orën 14: Tivar, Ulqin e Budvë 29, Podgoricë 28, Herceg Novi e Beranë 26, Plevle e Bjello Pole 25, Andrievicë e Rozhajë 24, Petnicë 23, Plluzhinë 22, Nikshiq, Kollashin e Shavnik 21, Cetinë 20 dhe në Zhablak 17 g.Për nesër pritet mot me vranësira mesatare deri krejtësisht i vranët dhe kohë pas kohe me reshje shiu, rrebeshe dhe bubullima. Në pjesën më të madhe të vendit janë të mundshme edhe reshje mesatare deri të dendura shiu. Do të fryjë erë mesatare deri e fortë, herë pas here e furishme dhe shumë e fortë nga drejtimet e jugut. Temperatura e mëngjesit nga 12 deri në 22, kurse më e larta e ditës prej 15 deri në 25 gradë.