Ditari 13.11.2024

Ditarin e përgatiti Marash Dedvukaj

Nikoletës Uskokoviq, pas marrjes në pyetje i është caktuar masa e paraburgimit deri në 72 orë

Nikoleta Uskokoviq, e cila u arrestua dje lidhur me vrasjen e Petar Lipovinës dhe Zharko Pejakoviqit, është marrë në pyetje në Prokurorinë e Lartë Shtetërore në Podgoricë, me ç’rast i është caktuar masa e paraburgimit deri në 72 orë. Uskokoviq është e dyshuara e katërt në këtë rast. Më herët janë arrestuar Aleksandar Daciq, Sava Kallugjeroviq dhe Milan Marjanoviq. Avokati i Nikoleta Uskokoviqit, Nikolla Strugar, pas seancës ka bërë me dije se e ajo akuzohet për tri vepra penale: anëtarësim në organizatë kriminale, vrasje në bashkëpunim dhe armëmbajtje pa leje. Ajo është mbrojtur me heshtje, tha Strugar. Ajo beson se nuk ka dyshim të arsyeshëm që prokuroria ta kallëzojë për këto vepra penale. Ndalimi është caktuar për shkak të rrezikut të arratisjes, ndikimit tek dëshmitarët dhe rrezikut që ajo ta përsërisë krimin. Sigurisht që nuk ka të bëjë me ngjarjen në fjalë. Është e padiskutueshme se ajo nuk ka qenë e pranishme në atë vend, tha Strugar.

Zyrtarët policorë kanë proceduar penalisht tetë persona

Zyrtarët policorë kanë proceduar penalisht tetë persona pranë organeve kompetente për abuzim me drogë, njoftoi Administrata e Policisë. Policia tha se oficerët e sigurimit të Tivarit dhe Ulqinit në bashkëpunim me zyrtarët e Qendrave Rajonale të Sigurisë (QRS) Qendër dhe Veri kanë realizuar një operacion shumëmujor të quajtur “Kaçema”. Ata thanë se aksioni kishte për qëllim zbulimin, parandalimin dhe ndalimin e shitjes në rrugë të kokainës dhe marihuanës në Ulqin dhe Tivar. Siç kanë thënë ata, gjatë zbatimit të aktiviteteve në kuadër të këtij rasti, policia ka ndjekur penalisht tetë persona, të cilëve u është konfiskuar droga, si dhe sende të tjera. “Në katër lokacione në Ulqin, Podgoricë dhe Rozhajë, gjatë ditës së djershme  janë kontrolluar banesat dhe është arrestuar L.S. (21) dhe V.M. (22) nga Podgorica, E.Š. (29) nga Rozhaj, si dhe D.E. (29) nga Berani, me vendbanim në Ulqin”, thuhet në njoftim.

U vazhdohet paraburgimi Katniqit dhe Llazoviqit

Kolegji gjyqësor i Gjykatës së Apelit e ka konfirmuar vendimin e Gjykatës së Lartë në Podgoricë për vazhdimin e paraburgimit prokurorit special kryesor Milivoje Katniq dhe ish-ndihmësdrejtorit të Drejtorisë së Policisë Zoran Llazoviq, njoftoi këshilltarja e pavarur në Gjykatën e Lartë Maria Rakoviq. Rakoviq tha se ankesa kundër vendimit të Gjykatës së Lartë në Podgoricë për vazhdimin e paraburgimit nga 12 tetori i këtij viti, e cila u refuzua si e pabazë, është paraqitur nga avokati mbrojtës i Katniqit, por jo edhe Zoran Llazoviqi.

Në mesnatë ka skaduar afati për dorëzimin e listave zgjedhore për zgjedhjet lokale në Beranë

Në mesnatë ka skaduar afati për dorëzimin e listave zgjedhore për zgjedhjet lokale në Beranë, të cilat do të mbahen më 8 dhjetor. Janë dorëzuar 10 lista, katër prej të cilave janë konfirmuar, thotë kryetari i Komisionit Komunal të Zgjedhjeve, Admir Zejnilloviq. Kryetari aktual i komunës, Bozho Premoviq, është bartës i listës së Malit të Zi Demokratik, ndërkaq deputetja Jelena Bozhoviq udhëheq  koalicionin “Për të Ardhmen e Beranit”. Partia Socialiste Popullore dhe Lëvizja Evropa Tani kanë formuar koalicion parazgjedhor. Partia boshnjake del e vetme para qytetarëve, ashtu si edhe Partia Demokratike e Socialistëve. Aleanca Evropiane bashkon disa parti.

Rakoçeviq - Partitë që janë opozita në nivel shtetëror dhe ato që çuan në zgjedhjet në Podgoricë do të bien dakord për një qeveri të re në kryeqytet

Partitë që janë opozitë në nivel shtetëror dhe ato që çuan në zgjedhjet në Podgoricë, nëse ka përgjegjësi ndaj qytetarëve, në bazë të principeve dhe parimeve demokratike, do të bien dakord për një qeveri të re në kryeqytet, tha zv. i Partisë Demokratike të Socialistëve (PDS) Nikolla Rakoçeviq. Ai tha se PDS ka një qëndrim të përgjegjshëm ndaj mesazheve të qytetarëve. Rakoçeviq tha se ata janë subjekti më i fortë politik, prandaj kanë nisur negociatat dhe bisedimet me të gjithë ata që nuk janë pushtet në nivelin qendror, që është platforma parimore në të cilën kanë marrë pjesë në zgjedhjet në kryeqytet. Ai tha për Agjencinë MINA se PDS beson se këto bisedime do të vazhdojnë pas finalizimit dhe zyrtarizimit të platformës që do t'ua ofrojnë qytetarëve dhe subjekteve politike, të cilët besojnë se mund të jenë partnerë në vendosjen e normalitetit, seriozitetit dhe rendit në Podgoricë. “Nëse ka përgjegjësi dhe parime ndaj qytetarëve dhe dinjitet ndaj tyre, atëherë partitë politike që janë opozitë në nivel qendror dhe partitë që çuan në zgjedhjet në kryeqytet do të ulen dhe do të bien dakord për qeverinë në Podgoricë në bazë të principeve dhe parimeve demokratike”, tha Rakoçeviq.

N.Gjurashkoviq - 13 Nëntori është ditë e rëndësishme për Cetinën

13 Nëntori është dita e Qytetit dhe dita e Çlirimit të Cetinës. Ky qytet është shembull se si përkundër dallimeve politike mund të punohet në interes të qytetarëve, tha kryetari i komunës së Cetinës, Nikolla Gjurashkoviq. Ai deklaroi se në këtë qytet, i cili feston sot Ditën e Çlirimit, ata arritën të kapërcejnë ndarjet politike përmes dialogut konstruktiv dhe punës së përbashkët në projekte kyçe. Gjurashkoviq tha se si pozita ashtu edhe opozita në Cetinë janë të vetëdijshme për rëndësinë e bashkëpunimit kur bëhet fjalë për çështje që lidhen drejtpërdrejt me cilësinë e jetës së qytetarëve dhe zhvillimin e qytetit. Cetina ka vend të veçantë në jetën historike, kulturore dhe politike të Malit të Zi, që do të thotë se shumë procese shoqërore dhe politike në vend fillojnë ose kanë një ndikim të rëndësishëm pikërisht këtu, tha Gjurashkoviq.

Kryeministri Spajiq uroi qytetarët e Cetinës për ditën e kryeqytetit

Cetina është simbol kombëtar dhe rajonal i lirisë, shtetësisë malazeze dhe dinjitetit të paepur njerëzor, tha kryeministri Millojko Spajiq. Spajiq, siç ka njoftuar kabineti i tij, ka uruar qytetarët e Cetinës për Ditën e Kryeqytetit dhe tetë dekada nga çlirimi i qytetit të heronjve. Siç ka thënë ai, Cetina është simbol kombëtar dhe rajonal i lirisë, i shtetësisë malazeze dhe i paepur i dinjitetit njerëzor. Spajiq tha se 13 nëntori është një nga datat më të mëdha në historinë e pasur  të Cetinjes. Është, siç tha ai, data “kur kujtojmë të gjitha uljet dhe ngritjet e shkëlqyera të Kryeqytetit dhe sfidat ndaj të cilave u ekspozua në të kaluarën shekullore dhe shikojmë rrugën e ardhshme të zhvillimit. që  ecë në frymën e respektimit të trashëgimisë kombëtare dhe vlerave më të larta europiane”. “Mjafton të hedhim një pamje të përciptë, panoramike të arkitekturës dhe ndërtesave më të njohura të qytetit  dhe të konkludojmë se rruga jonë e hyrjes nuk është gjë tjetër veçse një kthim pa rezerva në rrugën e përcaktuar kohë më parë”, thuhet në mesazhin e urimit të Spajiqit.

Mali i Zi kremton sot Festën e kulturës

Mali i Zi kremton sot Festën e kulturës. Duke shënuar  ditëlindjen e Petrit të Dytë Petroviq - Njegosh, ne po tregojmë se sa e rëndësishme është krijimtaria kulturore për vendin tonë, tha ministrja Tamara Vujoviq. Në festën qendrore të Ditës së Njegoshit në Teatrin Kombëtar, ajo na kujtoi vlerat që ka lënë peshkopi Rade në letërsinë dhe filozofinë malazeze. Ajo theksoi se Njegoshi është një shkrimtar, poet, filozof, mendimtar malazez, por edhe evropian dhe ne jemi borxhli të përjetshëm të tij, sepse ai me veprat e tij me rëndësi universale e bëri Malin e Zi pjesë të barabartë të trashëgimisë së pasur dhe të larmishme evropiane dhe botërore.

Në Mal të Zi duhet të forcohen edhe më tej kapacitetet administrative

Në Mal të Zi duhet të forcohen edhe më tej kapacitetet administrative në lidhje me zbatimin e të drejtave të pronësisë intelektuale, tha kreu i grupit punues për kapitullin 7 të negociatave, Nebojsha Mugosha, duke theksuar se ndërgjegjësimi i qytetarëve për këtë çështje është më i madh në krahasim me fillimin e negociatave me Bashkimin Evropian (BE). Mugosha, në një intervistë për Agjencinë MINA, ka thënë se kur flasim për pronën intelektuale, flasim për krijime të mendjes njerëzore. Duke iu përgjigjur pyetjes se cilat janë përfitimet për kompanitë kur bëhet fjalë për të drejtat e pronësisë intelektuale, ai tha se kompanitë arrijnë përfitime ekonomike nga të drejtat e tyre të pronësisë intelektuale. "Një mënyrë është që ata t'i përdorin vetë të drejtat e tyre, për shembull duke përdorur një shpikje të caktuar që mbrohet me patentë përmes prodhimit të produkteve të tyre ose duke aplikuar një procedurë të caktuar për të cilën mbrohet ajo shpikje," tha Mugosha.

Për Qeverinë e Kosovës, shkëmbimi i territoreve me Serbinë, si mundësi për zgjidhjen e mosmarrëveshjeve, nuk duhet të vihet në diskutim

Për Qeverinë e Kosovës, shkëmbimi i territoreve me Serbinë, si mundësi për zgjidhjen e mosmarrëveshjeve, nuk duhet të vihet në diskutim. Ajo thotë se ka qenë dhe është kundër idesë së tillë. “Qeveria e Kosovës refuzon projekte e zgjidhje me karakter territorial”, ka thënë anëtari i  Qeveriës Përparim Kryeziu për Radion Evropa e Lirë. Ideja u ri-aktualizua javën e kaluar, kur kandidatja për komisionare të Zgjerimit të Bashkimit Evropian, Marta Kos, u deklarua kundër saj. Po atë javë, zgjedhjet presidenciale në SHBA i fitoi ish-presidenti republikan, Donald Tramp, i cili do ta marrë mandatin nga janari i vitit të ardhshëm Në administratën e parë të Trampit, ka pasur disa zyrtarë, që nuk e kanë përjashtuar opsionin e “korrigjimeve territoriale” mes Kosovës dhe Serbisë. Edhe vetë presidenti i atëhershëm i Kosovës, Hashim Thaçi, ka shpalosur në një forum në Austri idenë e tij për korrigjimin e kufijve me Serbinë. Ngjashëm, edhe presidenti i Serbisë, Aleksandar Vuçiq, ka folur për ndarje ndërmjet serbëve dhe shqiptarëve.

Trendafilova: Gjykatësit do të vendosin nëse ish-krerët e UÇK-së do të lirohen pasi ZPO-ja të përfundojë rastin

Kryetarja e Dhomave të Specializuara të Kosovës, me seli në Hagë, Ekaterina Trendafilova, tha se u takon gjykatësve që të vendosin nëse do të lirojnë nga paraburgimi katër ish-krerët e Ushtrisë Çlirimtare të Kosovës, kur Prokuroria e Specializuar të përfundojë rastin e saj. Zyra e Prokurorit të Specializuar (ZPO) ka thënë se deri në prillin e vitit 2025 pret që të përmbyllë marrjen në pyetje të dëshmitarëve në rastin kundër ish-presidentit të Kosovës, Hashim Thaçi, ish-deputetit Rexhep Selimi dhe dy ish-kryetarëve të Kuvendit të Kosovës, Kadri Veseli dhe Jakup Krasniqi, të cilët akuzohen për krime lufte dhe krime kundër njerëzimit. “Nuk e di nëse do të lirohen nga paraburgimi, kjo u takon gjykatësve të vendosin. E dini që gjykatësit lëshojnë vendime për masën e paraburgimit çdo dy muaj. Nuk e di se çfarë vendimi do të merret”, tha Trendafilova gjatë një konference online për media.

Sot është hapur edicioni i 27-të i Panairit të Librit “Tirana 2024”

Sot është hapur edicioni i 27-të i Panairit të Librit “Tirana 2024”. Panairi i cili do të jetë i hapur deri më 17 nëntor, ka mbledhur bashkë shtëpitë botuese e shkrimtarë nga Shqipëria, Kosova dhe Maqedonia e Veriut. Kryetari i Shoqatës së Botuesve të Shqipërisë, në intervistën për Programin e Mëngjesit në Radio Kosovë, Petrit Ymeri, bëri me dije se sivjet po marrin pjesë 95 ekspozues, ku pjesa më e madhe e tyre janë shtëpi botuese. “Ka mjaft tituj të rinj, libra të autorëve shqiptarë, ka shumë përkthime, ka shumë libra për fëmijë dhe ka shumë libra studimorë. Pra, ka një larmi shumë të madhe titujsh, të cilët i japin një dinamikë të vërtetë Panairit të Librit”, ka thënë ai. Ymeri foli edhe për agjendën e Panairit, duke theksuar se do të ketë edhe promovime të titujve të rinj. Pjesë e aktiviteteve të panairit do të jetë edhe “Sofaja e Librit”, që mirëpret shkrimtarë të ndryshëm. Panairi do të finalizohet me ndarjen e çmimeve letrare.

Shpërthime në Kiev pas sulmeve ruse me raketa dhe dronë

Kryetari i Kievit, Vitali Klitschko, ka raportuar shpërthime në qytet, teksa kryeqyteti ukrainas  sot u përball edhe me një sulm të ri rus me raketa dhe dronë. “Më shumë dronë po hyjnë në kryeqytet. Rreziku nga raketat vazhdon. Mos dilni nga strehimoret”, shkroi Klitschko në Telegram. Forcat ajrore ukrainase paralajmëruan më herët se një tufë dronësh dhe raketash ruse ishin nisur drejt Kievit dhe lëshuan alarmin për sulme ajrore në mbarë shtetin.“Presidenti rus, Vladimir] Putin aktualisht po kryen sulme me raketa ndaj Kievit”, shkroi në Telegram, Andriy Yermak, shefi i stafit i presidentit ukrainas, Volodymyr Zelensky. Rusia, që ka nisur pushtimin në shkallë të plotë të Ukrainës më 2022, javëve të fundit ka intensifikuar sulmet ndaj qyteteve ukrainase. Sulmet e fundit ruse kanë shkaktuar dëme të mëdha në infrastrukturën civile dhe të energjisë, teksa ukrainasit po përgatiten edhe për një dimër në kohën kur lufta po vazhdon.

Blinken: Dislokimi i trupave koreanoveriore kërkon përgjigje të vendosur

Sekretari amerikan i Shtetit, Antony Blinken, paralajmëroi se dislokimi i trupave të Koresë së Veriut përkrah forcave ruse, që luftojnë në kufirin ukrainas, kërkon “përgjigje të vendosur”. Blinken, tha se ka diskutuar me shefin e NATO-s, Mark Rutte, për faktin që forcat koreanoveriore janë “përfshirë në betejë, dhe tani, në luftime dhe kjo kërkon dhe do të ketë një përgjigje të vendosur”. Blinken u takua me Rutten në Bruksel, teksa administrata në largim e presidentit amerikan, Joe Biden, po tenton të çimentojë mbështetjen për Ukrainën, para se republikani Donald Trump të marrë detyrën e presidentit.

SHBA-ja sulmon një grup aleat të Iranit në Siri

Forcat amerikane kanë kryer sulme kundër caqeve të lidhura me një grup në Siri, që mbështetet nga Irani, tha ushtria e Shteteve të Bashkuara. Ndërkaq, një grup monitorues tha se nga sulmet amerikane janë vrarë pesë luftëtarë. Këto sulme ishin në përgjigje të një sulmi me raketa ndaj trupave amerikane në Siri, tha Komanda Qendrore amerikane (CENTCOM). Sulmet kishin për shënjestër “një depo të armëve dhe një seli të logjistikës, në përgjigje të një sulmi me raketa ndaj personelit amerikan”, tha CENTCOM përmes një postimi në rrjetet sociale, por nuk identifikoi grupin e sulmuar. “Nuk kishte dëme në ndërtesat e SHBA-së e as të plagosur në mesin e personelit amerikan apo të forcave partnere gjatë këtij sulmi”, shtoi CENTCOM.

Libani thotë se 29 persona janë vrarë nga sulmet izraelite

Libani tha se sulmet e djeshme ajrore izraelite kanë vrarë 29 persona në mbarë vendin, në mesin e tyre edhe persona që ishin zhvendosur si pasojë e konfliktit mes Izraelit dhe Hezbollahut, grupit militant dhe partisë politike që kontrollon shumicën e jugut të Libanit. Sulmet kanë shënjestruar jo vetëm bastionet e Hezbollahut, sikurse janë ato në periferi të Bejrutit, por edhe zona ku ky grup, që mbështetet nga Irani, tradicionalisht nuk ka prani. Ministria e Shëndetësisë e Libanit tha se në një qytezë në jug të Bejrutit u vranë të paktën 12 persona dhe u plagosën tetë të tjerë. Agjencia shtetërore e lajmeve në Liban tha se në ndërtesën që u shënjestrua po strehoheshin personat që kishin ikur nga bombardimet që Izraeli kryen në luftën kundër Hezbollahut.

Irani thotë se “ende ekzistojnë” kanale të komunikimit me SHBA-në

Kryediplomati i Iranit tha se kanalet e komunikimit me Shtetet e Bashkuara janë ende të hapura. Këtë deklaratë Abbas Araghchi e bëri një javë pasi republikani, Donald Trump, fitoi zgjedhjet presidenciale në SHBA. “Kanalet e komunikimit mes nesh dhe amerikanëve ende ekzistojnë”, tha ai, pas takimit javor të Qeverisë iraniane. “Ne kemi dallime me amerikanët, që nganjëherë janë shumë thelbësore dhe nuk mund të zgjidhen, por ne kemi arritur t’i menaxhojmë ato për të ulur kostot e tyre dhe për të ulur tensionet”, shtoi ai. Muajin e kaluar, Araghchi tha se nuk ka bazë për mbajtjen e bisedimeve indirekte me SHBA-në për çështjet bërthamore. “Nuk shohim se ka ndonjë bazë për bisedime të tilla, derisa ta kalojmë krizën aktuale”, tha Araghchi më 14 tetor gjatë një vizite në Oman. Omani për një kohë të gjatë ka ndërmjetësuar mes Iranit dhe SHBA-së, që shkëputën raportet pas revolucionit islamik të vitit 1979, që rrëzoi nga pushteti shahun e mbështetur nga Perëndimi, Mohammed Reza Pahlavi. Këto deklarata të kryediplomatit iranian janë  përsëritë dje  edhe nga presidenti i vendit. “Sa i përket Amerikës, na pëlqeu ose jo, ne dikur do të përballemi me këtë shtet në skenën rajonale dhe ndërkombëtare dhe është më mirë që ta menaxhojmë vetë këtë çështje”, tha presidenti Masoud Pezeshkian.

Biden takohet sot me Trumpin në Shtëpinë e Bardhë

Presidenti amerikan, Joe Biden, do të mirëpresë në Shtëpinë e Bardhë republikanin Donald Trump, pas fitores të tij në zgjedhjet presidenciale amerikane të 5 nëntorit. Takimi në Zyrën Ovalle është paraparë të zhvillohet në orën 17:00. Para takimit me Bidenin, Trump është planifikuar që të takohet me udhëheqësit republikanë në Kongresin amerikan. Partia Republikane do të ketë kontrollin e Senatit dhe ka mundësi që të marrë edhe shumicën në Dhomën e Përfaqësuesve. Biden, 81-vjeçar, e ka thirrur Trumpin, 78-vjeçar, pas zgjedhjeve për ta uruar atë për fitoren dhe e ka ftuar në takim në Shtëpinë e Bardhë. Përderisa demokratët e kanë cilësuar Trumpin si kërcënim për demokracinë, Biden megjithatë është zotuar se do të ketë transferim paqësor të pushtetit dhe do t’iu përmbahet protokolleve të zakonshme për këtë proces. Megjithatë, kështu nuk kishte ndodhur pas zgjedhjeve presidenciale në vitin 2020, kur Trump refuzoi të pranonte humbjen dhe nuk e kishte ftuar Bidenin për takim në Shtëpinë e Bardhë. Tramp poashtu nuk kishte marrë pjesë në ceremoninë e inaugurimit të Bidenit.

Trump emëron Muskun në krye të një departamenti të ri

Presidenti amerikan, Donald Trump, do të emërojë Elon Muskun në një rol që synon të krijojë një qeveri më efikase, duke i dhënë edhe më shumë ndikim njeriut më të pasur në botë, i cili dhuroi miliona dollarë për të ndihmuar Trumpin që të fitonte zgjedhjet presidenciale. Musk dhe ish-kandidati republikan për president, Vivek Ramaswamy, do të drejtojnë së bashku një Departament të sapokrijuar për Efikasitetin e Qeverisë, entitet, që sipas Trumpit, do të operojë jashtë ekzekutivit amerikan. Përmes një deklarate, Trump tha se Musk dhe Ramaswamy, “do t’i mundësojnë administratës sime që të zhdukë burokracinë qeveritare, që të zvogëlojë numrin e rregulloreve të tepërta, që të shkurtojë shpenzimet e kota dhe që të ristrukturojë agjencitë federale”. Trump tha se ky departament i ri do të realizojë ëndrrat e kamotshme të republikanëve dhe do të ofrojë “këshilla dhe udhëzime nga jashtë Qeverisë”, duke sinjalizuar se rolet e Muskut dhe Ramaswamyt mund të jenë joformale dhe nuk do të ketë nevojë për miratimin e Senatit për emërimin e tyre. Një gjë e tillë do t’i mundësonte Muskut që të mbeste në krye të kompanisë së tij për makina elektrike, Tesla, të platformës sociale X, dhe të kompanisë së raketave, SpaceX.

Për nesër pritet mot i ndryshueshëm

Për nesër pritet mot me vranësira mesatare deri në plotësisht i vranët, vende-vende me reshje shiu, në zonat malore në veri edhe skllotë dhe borë. Reshje më të shpeshta priten paradite, veçanërisht në mëngjes, ndërsa në pjesën e dytë të ditës pritet mot kryesisht i thatë. Do të fryjë erë e dobët deri mesatare, gjatë natës vende-vende deri e fortë nga veriu. Temperatura e mëngjesit nga -4 deri në 10, kurse më e larta ditore nga 0 deri në 16 gradë.