Ditari 11.04.2025

Ditarin e përgatiti, Violeta Gjokaj

Lirimi nga akuzat i të pandehurve në aferën "Zarfi"

Gjykata e lartë në Podgoricë ka liruar sot të gjithë të pandehurit në aferën “Zarfi”, përfshirë biznesmenin Dushko Knezheviq dhe ish-kryetarin e Podgoricës Sllavolub Stijepoviq.
Vendimi i shkallës së parë u dha nga trupi gjykues i përbërë nga gjyqtari Nenad Vujanoviq, raporton Vijesti.
Përveç Knezheviqit dhe Stijepoviqit, nga akuzat u liruan edhe Branisllav Todoroviq, Zhivko Shlivancanin, Tamara Krxhiq,Goran Grujović dhe Tomica Knezheviq.
Gjykatësi tha se nuk kishte prova kundër të pandehurve.
Avokatja Andrijana Raziq, një nga avokatet mbrojtëse të Knezheviq, u tha gazetarëve se mbrojtja nuk ishte e befasuar nga lirimi nga akuzat dhe se ata e kishin pritur atë.
Në dhjetor 2019, Zyra e Prokurorit të Shtetit Special ngriti një aktakuzë kundër Knezheviq-it, duke e etiketuar atë si organizatorin e një grupi kriminal që dyshohet se pastroi para.
Disa muaj më parë, në janar 2019, Kzheviq publikoi një video ku tregohej duke i dorëzuar një zarf Stijepoviq para zgjedhjeve të vitit 2016, duke shpjeguar se ai përmbante 97.5 mijë euro për të financuar fushatën e Partisë Demokratike të Socialistëve.

Millatoviq: Pritet që Bashkimi Evropian të deklarojë qartë nëse Marrëveshja ndërmjet Malit të Zi dhe Emirateve të Bashkuara Arabe është në përputhje me trashëgiminë juridike të BE-së

Presidenti Jakov Millatoviq ka deklaruar se pritet që Bashkimi Evropian të deklarojë qartë nëse Marrëveshja ndërmjet Malit të Zi dhe Emirateve të Bashkuara Arabe është në përputhje me trashëgiminë juridike të Bashkimit Evropian që, siç tha ai, është e nevojshme për shkak të përkushtimit strategjik të Malit të Zi si anëtar i plotë i Unionit.
Millatoviq theksoi gjithashtu se radha e ngjarjeve pas kthimit të kryeministrit Millojko Spajiq nga Dubai nuk është e rastësishme.

Spajiq: Duke nënshkruar Marrëveshjen me Emiratet e Bashkuara Arabe, treguam se jemi një partner i besueshëm

Kryeministri Millojko Spajiq përshëndeti iniciativën për të krijuar një marrëveshje të re tregtare dhe ekonomike midis Bashkimit Evropian (BE) dhe Emirateve të Bashkuara Arabe (EBA), të nisur nga Presidenti Mohamed bin Zayed dhe Presidentja e Komisionit Evropian Ursula von der Leyen.
Spajiq shkroi në platformën X se duke nënshkruar Marrëveshjen me Emiratet e Bashkuara Arabe, Mali i Zi tregoi se është një "partner kredibil dhe i besueshëm i aktereve më me ndikim globalë ".
“Tani varet nga ne të zbatojmë projekte të mëdha dhe t’i japim Malit të Zi të ardhmen që meriton”, shkroi Spajiq.
Kujtojmë se projektligji për ratifikimin e marrëveshjes për bashkëpunimin në fushën e turizmit dhe zhvillimit të pasurive të paluajtshme ndërmjet Qeverisë së Malit të Zi dhe Qeverisë së Emirateve të Bashkuara Arabe së shpejti do të jetë objekt debati dhe vendimmarrjeje në Kuvend.

Letër në adresat e Parlamentit Evropian dhe Komisionit Evropian

Organizatat e shoqërisë civile sot dërguan letra në disa adresa në Bruksel, ku kërkojnë vlerësimin e përputhshmërisë së Marrëveshjes së nënshkruar për bashkëpunimin në turizmin dhe zhvillimin e pasurive të paluajtshme ndërmjet Malit të Zi dhe Emirateve të Bashkuara Arabe me Marrëveshjen e Stabilizim Asociimit.

Letrat janë dërguar, ndër të tjera, në adresat e Parlamentit Evropian dhe Komisionit Evropian.

Në letër, këto organizata shprehnin shqetësim serioz se Marrëveshja me Emiratet e Bashkuara Arabe paraqet kërcënim të rëndësishëm për sundimin e ligjit, mbrojtjen e mjedisit dhe procesin e integrimit të Malit të Zi në BE.

Do të kërkojnë një përgjigje me shkrim nga Spajiq për përfundimet e Kuvendit të Cetinës

Kuvendi i Cetinës do t'i dërgojë një kërkesë Kryeministrit Millojko Spajiq që të paraqesë një përgjigje me shkrim brenda 14 ditëve dhe të vendosë mbi përfundimet që ka miratuar lidhur me ngjarjet tragjike në Cetinë.
Siç u njoftua nga Cetina , ajo u miratua unanimisht në seancën e jashtëzakonshme të sotme kushtuar dinamikës së realizimit të përfundimeve të miratuara më 10 janar, e cila u iniciua nga kryetari i bashkisë Nikolla Gjurashkoviq.
Thuhet se Kuvendi i Cetinës autorizoi gjithashtu kryetaren e parlamentit lokal, Milena Vujoviq, që të formojë një trup të posaçëm punues që do të jetë përgjegjës për monitorimin e zbatimit të përfundimeve të arritura në lidhje me ngjarjet tragjike në Cetinë.
Trupi punues, siç thanë, do të përbëhet nga përfaqësues të të gjitha subjekteve politike të përfaqësuara në parlamentin lokal, si dhe përfaqësues të administratës lokale.

Millatoviq: Diplomacia është gjithnjë e më e rëndësishme në kapërcimin e sfidave aktuale gjeopolitike

Presidenti i Malit të Zi, Jakov Millatoviq, tha se në kohë sfiduese, diplomacia bëhet gjithnjë e më e rëndësishme, dhe për këtë arsye, në përpjekjet për të zgjidhur problemet aktuale, është thelbësore të shikohen gjërat nga këndvështrimi i palës tjetër, në mënyrë që të kuptohen plotësisht të gjitha rrethanat dhe vendimet që merren.
Millatoviq foli në një panel lidershipi të titulluar "Kërkimi për Partneritet në Epokën e Multipolarizimit", të mbajtur në kuadër të Forumit Diplomatik të Antalias, ku mori pjesë me ftesë të Presidentit të Republikës së Turqisë, Rexhep Tajip Erdogan.
Ai theksoi se në kohë sfiduese, diplomacia bëhet gjithnjë e më e rëndësishme, dhe për këtë arsye, në përpjekjet për t'iu qasur zgjidhjes së problemeve aktuale, është thelbësore të shikohen gjërat nga këndvështrimi i palës tjetër, në mënyrë që të kuptohen plotësisht të gjitha rrethanat dhe vendimet që merren.
Ai tha se Mali i Zi, si kandidati më i përparuar për anëtarësim në Bashkimin Evropian, ka një qëllim realist për t'u bërë anëtari i radhës deri në vitin 2028, dhe se anëtarësimi i vendit tonë mund të jetë një shembull i një historie të suksesshme dhe një nxitje për vendet e tjera kandidate.

Markoviq: Ministria dhe Ushtria e Malit të Zi janë aktive në forcimin e sigurisë kibernetike

Sistemet e zhvilluara dhe komplekse për akses të paautorizuar në të dhëna, për spiunazh industrial dhe lloje të tjera, janë një kërcënim që duhet të kundërshtohet në mënyrë të organizuar dhe sistematike, tha Sekretari i Shtetit në Ministrinë e Mbrojtjes, Marko Markoviq.
Ai foli në Konferencën e Dytë Ndërkombëtare të Menaxherëve të Sigurisë në Mal të Zi "Siguria pa Kompromis" të organizuar sot dhe nesër në Budva nga Shoqata e Menaxherëve të Sigurisë së Malit të Zi në bashkëpunim me Shoqatën e Menaxherëve të Sigurisë së Korporatave të Evropës Juglindore (SEECSA).
Markoviq, siç raportohet nga Ministria e Mbrojtjes, tha se Qeveria e njeh rëndësinë e përmirësimit të sigurisë kibernetike dhe se Qendra e parë Rajonale për Kapacitetet Kibernetike në Ballkan (WB3C) u hap vitin e kaluar në Mal të Zi, me mbështetjen e partnerëve nga Franca dhe Sllovenia.
“Hapja e një qendre të tillë ka rritur ndjeshëm reputacionin e Malit të Zi në mjedisin ndërkombëtar dhe do të luajë një rol kyç në ruajtjen e mjedisit tonë dixhital, mbrojtjen e qytetarëve tanë dhe inkurajimin e një kulture të sigurisë kibernetike që do të përdoret nga brezat që do të vijnë”, tha Markoviq.

Në mesnatë, heshtje zgjedhore përpara zgjedhjeve në Nikshiq dhe Herceg Novi

Heshtja zgjedhore përpara zgjedhjeve lokale që do të mbahen të dielën në Nikshiq dhe Herceg Novi do të fillojë në mesnatë.
Kryetari i Komisionit Komunal Zgjedhor (KKZ) Nikshiq, Rade Perishiq, i tha Agjencisë MINA se 57,589 votues kanë të drejtë vote në atë qytet dhe se në zgjedhje po marrin pjesë dhjetë lista.
Perishiq tha se qytetarët e Nikshiqit do të votojnë në 131 qendra votimi.
Kryetari i KKZ-së së Herceg Novit, Dejan Radoniq, i tha agjencisë MINA se në zgjedhjet në atë komunë, në të cilat marrin pjesë nëntë parti, të drejtë vote kanë 25,603 votues.
Radoniq tha se votuesit do të votojnë në 47 qendra votimi.
Qendrat e votimit hapen në orën 7 të mëngjesit dhe mbyllen në orën 8 të mbrëmjes.

Ka përfunduar dëgjimi i dëshmitarëve në procedurën kundër kryetarit dhe anëtarëve të Këshillit drejtues të RTMZ-së

Në Gjykatën Themelore në Podgoricë ka përfunduar dëgjimi i dëshmitarëve në procedurën kundër kryetarit dhe anëtarëve të Këshillit drejtues të Radiotelevizionit të Malit të Zi.
Prokuroria Themelore ka ngritur aktakuzë kundër kryetarit dhe katër anëtarëve të Këshillit drejtues të Transmetuesit publik, për shkak të emërimit të paligjshëm të drejtorit të përgjithshëm Boris Raoniq.
U dëgjuan anëtarët e Këshillit Marjana Camoviq Veliçkoviq, Milica Shpajak dhe ish-anëtari Bojan Baqa. Seanca e radhës është caktuar më 6 qershor.

Osmani: Turqia mbetet partnere e rëndësishme e Kosovës

Presidentja e Kosovës, Vjosa Osmani, i ka lartësuar sot marrëdhëniet e vendit të saj me Turqinë, pas një takimi me presidentin turk, Recep Tayyip Erdogan, në Forumin e Diplomacisë në Antalia.
Në një postim në Facebook, Osmani tha se Turqia është dhe do të mbetet partnere e rëndësishme e Kosovës për paqen, sigurinë dhe zhvillimin rajonal.
“Marrëdhëniet tona janë më shumë se miqësi, janë një partneritet i ndërtuar mbi besim, respekt dhe vizion të përbashkët për të ardhmen”, tha ajo.
Sot në Antalia nisi edicioni i katërt i Forumit dyditor të Diplomacisë, i organizuar nga Ministria e Punëve të Jashtme të Turqisë, nën patronazhin e Erdoganit.
Forumi këtë vit trajton temën "Rikthimi i Diplomacisë në një Botë të Fragmentuar", e cila pasqyron nevojën urgjente që diplomacia të vihet në pah si forcë stabilizuese, mes rritjes së tensioneve globale.
Osmani e përshkroi Erdoganin si “lider që i qëndroi Kosovës pranë gjithmonë, në çdo sfidë e në çdo sukses”.
“Një mik i dëshmuar i Kosovës, një zë i fuqishëm për të drejtën tonë, dhe një shtyllë e fortë mbështetjeje në çdo etapë të shtetndërtimit tonë”, tha ajo.
Turqia është një prej shteteve me praninë më të madhe të investimeve direkte në Kosovë.

Levizja Vetvendosje nuk ka numrin e nevojshëm për të qeverisur e vetme

Pavarësisht se Lëvizja Vetëvendosje në zgjedhjet e 9 shkurtit arriti të marrë 48 mandate në Kuvendin e Kosovës me 120 deputet dhe nuk ka numrin e nevojshëm për të qeverisur e vetme, ligjvënëse e kësaj Lëvizjeje shprehen optimist se partia e tyre e ka arritur të sigurojë numrin e nevojshëm të votave për ekzekutivin e ri .
Pasi mbajti takime me partneret politik të anë fituar vend në Kuvend , një ditë më pare kryeministri në detyrë Albin Kurti , ftoi për takim kreun e Lidhjes Demokratike të Kosovës , Lumir Abdixhiku, i cili përjashtoi mundësinë e bashkëpunimit për qeverinë e re.
Legjislatura e re e Kuvendit të Kosovës pritet të konstituohet me 15 prill.

Shqipëri: Ka nisur zyrtarisht fushata zgjedhore për zgjedhjet parlamentare

Ditën e sotme nis zyrtarisht fushata zgjedhore për zgjedhjet parlamentare në Shqipëri që do të mbahen më 11 maj. Në garë për këto zgjedhje do të jenë 11 subjekte në flet votime , ku përfshihen parti dhe koalicione . Çdo forcë politike apo koalicion , sipas formulës së re elektorale , ka 186 kandidatë për deputet, ku 46 janë nga lista e mbyllur dhe 14 nga lista e hapur. Nga të dhënat e gjëndëruar nga Drejtoria e Përgjithshme e Gjendjes Civile të drejtën e votës për zgjedhjet e 11 majit kanë 3 milion e 713 mijë e 761 shtetas shqiptar , brenda e jashtë vendit.

Bërnabiq: Seanca për zgjedhjen e Qeverisë së re të Serbisë mbahet më 14 prill

Kryetarja e Kuvendit të Serbisë, Ana Bërnabiq, njoftoi sot se më 14 prill do të mbahet një seancë për votimin e Qeverisë së re të vendit, duke theksuar se “deputetëve u takon t’ia japin një shans” mandatarit Gjuro Macut.
“Shpresoj që seanca të mund të nisë tashmë të hënën, sepse duhet ta përfundojmë këtë proces deri më 18 prill në mesnatë. Pra, emrat e ministrave dhe përbërjes do t’i dimë atëherë, por kjo varet para së gjithash nga mandatari”, tha Bërnabiq për Radio Televizionin e Serbisë (RTS).
Ajo tha se i ka ftuar përfaqësuesit e opozitës parlamentare për bisedime, në mënyrë “që t’ia japim një shans profesorit Macut”.
Presidenti i Serbisë, Aleksandar Vuçiq, e mandatoi javë më parë endokrinologun dhe profesorin e Fakultetit të Mjekësisë në Beograd, Gjuro Macut, për formimin e Qeverisë së re.
Vuçiq më herët kishte zhvilluar konsultime me partitë parlamentare lidhur me mandatarin për përbërjen e Qeverisë së re.

Bruksel: Përfaqësuesit e rreth 50 shteteve janë mbledhur për një takim të Grupit të Kontaktit të Mbrojtjes së Ukrainës

Në Bruksel, përfaqësuesit e rreth 50 shteteve janë mbledhur për një takim të Grupit të Kontaktit të Mbrojtjes së Ukrainës, me qëllimin e vlerësimit të situatës në terren dhe mënyrës se si mund të ofrohet mbështetje shtesë për Ukrainën.
Britania e Madhe njoftoi se Ukrainës do t’i ndahen 580 milion dollarë ndihmë ushtarake, në prag të samitit të Grupit të Kontaktit për Ukrainën.
Ky takim, i cili është pjesë e angazhimeve ndërkombëtare për të mbështetur Ukrainën në luftën e saj kundër agresionit rus, reflekton angazhimin e vazhdueshëm të shteteve të ndryshme për të siguruar mbrojtjen dhe stabilitetin në rajon.

Peticioni që bën thirrje për përfundimin e luftës në Gaza dhe lirimin e pengjeve

Mijëra figura ushtarak dhe akademike të Izraelit i janë bashkuar një peticioni që bën thirrje për përfundimin e luftës në Gaza dhe lirimin e pengjeve .
Sipas mediave izraelite , peticioni i nënshkruar nga 2 mijë akademikë izraelitë, por ajo nuk është publikuar ende zyrtarisht dhe po organizohet nga profesionistët e përshirë.
Ndërkohë, siç njoftojnë mediat, të paktën 12 palestinez , 10 prej të cilëve ishin nga e njëjta familje janë vrarë në sulmet ajrore izraelite në Rripin e Gazës .
Agjencia zyrtare palestineze e lajmeve VAFA njoftoi se 12 persona janë vrarë në sulmet e kryera ndaj Kan Junis në jug të Gazës dhe Beit Lahia në Veri të Gazës.

Gjashtë persona humbën jetën kur helikopteri u rrëzua në lumin Hudson

Gjashtë persona, përfshirë tre fëmijë, humbën jetën kur një helikopter u rrëzua në lumin Hudson në Nju Jork, thanë autoritetet.
Një familje me pesë anëtarë nga Spanja, të cilët ndodheshin në New York si turistë, vdiqën, raporton BBC.
"Viktima e gjashtë është piloti", u tha gazetarëve kryebashkiaku i New York City, Eric Adams.
Komisionerja e Policisë së Nju Jorkut, Jessica Tisch, tha se identitetet e viktimave nuk do të bëhen të ditura derisa të njoftohen familjet.
Hetimi për shkakun e rrëzimit të helikopterit është duke vazhduar.

Kina i kundërpërgjigjet SHBA-së me tarifë prej 125 për qind

Kina njoftoi sot se e ka rritur tarifën ndaj mallrave amerikane nga 84 për qind në 125 për qind, duke iu kundërpërgjigjur presidentit amerikan, Donald Trump, i cili ditë më parë e rriti tarifën ndaj mallrave kineze në 145 për qind.
Tarifa e re e Pekinit për mallrat e importuara nga Shtetet e Bashkuara do të hyjë në fuqi të shtunën.
Kina kishte paralajmëruar se do t’i luftonte tarifat amerikane me kundërmasa, duke i cilësuar veprimet e Trumpit si “bullizëm ekonomik”.Veprimet e Trumpit për tarifa ndaj të gjitha vendeve të botës bënë që drejtuesit e bizneseve të paralajmëronin për recesion të mundshëm ekonomik. Disa nga partnerët më të mëdhenj tregtarë të SHBA-së u hakmorën duke vendosur taksa ndja mallrave amerikane, megjithatë Trump njoftoi një pezullim 90 ditor.
Ministria e Tregtisë e Kinës tha se do ta dorëzojë një tjetër padi në Organizatën Botërore të Tregtisë kundër tarifave amerikane.

Nesër mot i ndryshueshëm

Në Mal të Zi mban mot kryesisht me diell, vende-vende me vranësira të pakta deri mesatare , kryesisht në pjesët veriore.
Frynë erë e dobët deri mesatare , ne veri edhe e fortë , kryesisht e drejtimeve jugore dhe perëndimore.
Temperaturat e shënuara në orën 14: Herceg Novi 20 gradë , Podgoricë, Nikshiq e Budvë 18, Tivar e Ulqin 17, Plevle e Bijello Pole 16, Beran, Cetinë e Shavnik 15, Kollashin e Andrievicë14, Plluzhinë e Rozhajë 13, Guci 12 dhe në Zhablak 10 gradë.

Në viset jugore dhe qendrore nesër pritet mot kryesisht me diell, kurse në veri me vranësira mesatare deri në plotësisht i vranët, paradite vende-vende edhe me reshje të herëpashershme të dobëta.
Do të fryjë erë mesatare deri e fortë nga drejtimet e veriut. Temperatura e mëngjesit nga 0 deri në 9, kurse më e larta ditore nga 9 deri në 21 gradë.