Ditari 25.08.2025

Përgatiti, Musa Gjoka

SHQEPANOVIQ: U SEKUESTRUA MARIHUANË ME VLERË MBI PESË MILIONË EURO

Drejtori në detyrë i Administratës së Policisë, Llazar Shqepanoviq, tha se duke zbuluar plantacionin më të madh të mariuhanës në Mal të Zi në operacionin "Trnovo", Administrata e Policisë u dha një goditje të fortë strukturave kriminale dhe se ky ishte sekuestrimi më i madh me vlerë mbi 5 milionë euro.

Shqepanoviq tha se lokaliteti në fjalë ishte në zonën e Crmnicës, vend i përshtatshëm për personat që ishin pjesë në këto aktivitete kriminale. "U mbjellën 13,000 dhe 100 copë fidanë, është çështje zgjedhjeje e tokës së përshtatshme, sistemit të ujitjes dhe furnizimit me ujë, sistemit të furnizimit me energji elektrike..." tha Shqepanoviq. Ai theksoi se ky ishte konfiskimi më i madh i mariuhanës me vlerë mbi 5 milionë, i cili më vonë do të arrinte në 10 milionë euro në shpërndarje të mëtejshme përmes shitjeve. Ai theksoi se kishte filluar një operacion i fuqishëm i Administratës së Policisë dhe se policia po punonte për të identifikuar të gjithë personat e lidhur me kontrabandën e drogës.  

PRODHIMI I MARIUANËS NË MAL TË ZI: NGA RASTE TË RRALLA NË NJË TREND TË RREZIKSHËM

Rasti i ri i zbulimit të plantacionit më të madh të mariuhanës në Mal të Zi mund të vijë si surprizë vetëm për ata më pak të informuar, të cilët nuk i ndjekin zhvillimet në fushën e kontrabandës dhe kultivimit të kësaj droge në territorin e vendit tonë. Është e vërtetë që është ende larg asaj që po ndodh me fqinjët tanë jugorë, në Shqipëri, por tashmë po tregohet si një trend i rrezikshëm. Në fakt, pas disa muaj veprimesh zbulimi dhe provash në kuadër të aksionit "Trnovo", policia zbuloi plantacionin më të madh të mariuhanës në Mal të Zi me mbi 13,000 fidanë. Dy persona, njëri nga Tivari dhe tjetri nga Zeta u privuan nga liria dhe u dyshuan për prodhim, shpërndarje dhe kontrabandë të paligjshme të drogave narkotike. "Në veprimin e koordinuar të Departamentit për luftimin e krimit ndërkufitar dhe korrupsionit, me ndihmën e qendrave rajonale të policisë kufitare "Jug" dhe "Qendër" dhe Departamentit për luftën kundër drogës, në territorin e komunës së Tivarit, në lokalitetin Tërnovo, u zbuluan tetë parcela me marihuanë që përbëjnë një tërësi, me rreth 13,100 fidanë të bimës Cannabis sativa, të cilët ishin në fazën e plotë të kultivimit.

NJË BURRË NGA BEOGRADI U PRANGOS PËR SHKAK TË SHPËRTHIMIT TË NJË SHISHE TË ZHYTJES

Për shkak të shpërthimit të një shisheje të zhytjes dje në Budva, u arrestua M.B. (1980) nga Beogradi, për veprën penale të krimeve të rënda kundër sigurisë së përgjithshme dhe veprën penale të biznesit të paligjshëm, bankar, dhe aktiviteteve të sigurimeve. Ai u privua nga liria me urdhër të prokurorit në detyrë, dhe në lidhje me incidentin e lartpërmendur në plazhin Ploçe në rajonin e Budvës, në të cilin u plagosën dy të mitur.  "Personi i privuar nga liria do të sillet në këtë prokurori për t'u marrë në pyetje brenda afatit ligjor, pas së cilës do të merret një vendim për rrjedhën e mëtejshme të procedurës", tha prokuroria për TVMZ.

FORMOHET LËNDA KUNDËR MILLO GJUKANOVIQ PAS PADIS NGA KOPRIVICA

Zyra e zëvendëskryeministrit për sistemin politik, drejtësinë dhe antikorrupsionin, Momo Koprivica, njoftoi se Prokuroria e posaçme e shtetit  ka hapur një çështje në lidhje me kallëzimin penal të ngritur kundër ish-Kryeministrit Millo Gjukanoviq, në lidhje me dhënien e koncesionit për Mini Hidro Elektranën Bistrica të ndërmarrjes BB Hidro. "Sipas letrës nga Prokuraria speciale e shtetit, zëvendëskryeministri Koprivica dorëzoi dokumentacionin në origjinal, dhe procesverbalet nga seancat e Qeverisë dhe përfundimet e saj në formën e një kopjeje të noterizuar," njoftoi kabineti i Koprivicës.  Ata shtojnë se Koprivica, së bashku me provat, deklaroi në kallëzimin penal, ndër të tjera, se Gjukanoviq, me veprimet e tij dhe duke i mundësuar djalit të tij Bllazho Gjukanoviq të lidhë një marrëveshje koncesioni me Qeverinë që ai drejtoi, shkeli rëndë dispozitat e nenit 14 të Ligjit për Parandalimin e korrupsionit, i cili, ndër të tjera, përcakton: “Një organ qeveritar në të cilin një zyrtar publik kryen një funksion publik nuk mund të lidhë një kontratë me një shoqëri biznesi ose një person tjetër juridik në të cilin zyrtari publik dhe një person i lidhur me të kanë një interes privat”.

SINDIKATA E ARSIMIT: ORË PUBLIKE ME 1 SHTATOR

Sindikata e Arsimit njoftoi se një orë publike do të mbahet më 1 shtator dhe tregoi se është e detyruar t'i paralajmërojë vendimmarrësit që të mos i nënvlerësojnë, as si profesion, as si qytetarë.  "Këshilli qendror i Sindikatës së Arsimit të Malit të Zi ju fton të mbani një orë publike në institucionet tona më 1 shtator. Përsëri, po shkelet Marrëveshja kolektive, në mënyrë të njëanshme dhe pa shpjegime. Për herë të parë, po na ulen pagat", njoftoi sindikata. Përsëri, theksojnë ata, janë të detyruar të ruajnë dinjitetin e profesionit të cilit i përkasin dhe të drejtat e garantuara nga ligjet dhe kontratat. “Edhe një herë, kemi obligim që me shembullin tonë t ju mësojmë se sa e rëndësishme është të luftojmë për drejtësi. Jemi të detyruar përsëri t'i paralajmërojmë vendimmarrësit që të mos na nënvlerësojnë, as si profesion, as si qytetarë", thuhet në deklaratën e Sindikatës të publikuar në rrjetet sociale, të nënshkruar nga Presidenti i Sindikatës Radomir Bozhoviq. Siç u tha, më 1 shtator, ata do të ripërtërijnë materialin e trajtuar në orën publike para Parlamentit të Malit të Zi, më 27 dhjetor 2023.

MIQ E BASHKËPUNËTORË HOMAZHE PËR GAZETARIN ARTUR ZHEJI

Në Universitetin e Arteve të Bukura, aty ku ai u diplomua për regji, sot u mbajtën homazhet për gazetarin Artur Zhejin, i cili u përcoll për në banesën e fundit. Familjarë, miq, kolegë, politikanë e personalitete të artit i dhanë lamtumirën publicistit, analistit dhe një prej zërave më të veçantë të gazetarisë dhe mendimit publik shqiptar, që ndërroi jetë papritur në moshën 64-vjeçare nga një arrest kardiak, në Sarandë.

Homazhet nisën në orën 10:00 dhe vijuan për 2 orë e gjysmë. Në hyrje të Universitetit u vendos edhe një kurorë me lule në emër të kryeministrit Edi Rama.

Ikja e tij e parakohshme bashkoi në dhimbje jo vetëm botën e medias, por edhe politikën e artin. Deputeti socialist Arben Pëllumbi e cilësoi Zhejin një figurë të rëndësishme të mendimit të lirë.

"Artur Zheji ishte një zë në vete në analizat e tij, në të cilat edhe po të mos ishe dakord me pikëpamjen, mënyrën civile të servirjes dhe të shtruar të mbrojtjes që ai bënte, do ta respektoje patjetër", tha Sali Berisha. 

Një pjesë e rëndësishme e punës së tij lidhej edhe me çështjen kombëtare dhe Kosovën. Këtë e kujtoi ish-ministri i Jashtëm Paskal Milo, që e kishte njohur prej 27 vitesh.

IZRAELI BOMBARDON SPITALIN NË JUG TË GAZËS, 15 TË VDEKUR, MES TYRE EDHE GAZETARË

15 persona janë vrarë, mes tyre edhe gazetarë, pas një sulmi ajror izraelit në një spital në jug të Gazës, tha Ministria e Shëndetësisë e drejtuar nga Hamasi. Në një deklaratë në mediat sociale, ministria e drejtuar nga Hamasi tha se kishte pasur dy sulme. Sipas ministrisë, Izraeli kishte në shënjestër katin e katërt të Spitalit Nasser. Po ashtu raportohet për të lënduar, por ende nuk dihet numri i saktë.  Përveç ofensivës në Gazë, Izraeli ka nisur sulme ajrore në Jemen, ku u raportua për disa të vdekur dhe dhjetëra të plagosur.

SULMET AJRORE IZRAELITE NË JEMEN, 6 TË VDEKUR DHE 86 TË PLAGOSUR

Të paktën 6 persona kanë humbur jetën dhe 86 të tjerë janë plagosur si pasojë e sulmeve ajrore izraelite në kryeqytetin e Jemenit, Sanaw. Sulmet ajrore u kryen të dielën në përgjigje të një rakete balistike të lëshuar nga territori jemenas drejt Izraelit të premten, në një përshkallëzim të mëtejshëm të tensioneve mes Tel Avivit dhe rebelëve të mbështetur nga Irani. Sipas një deklarate të ushtrisë izraelite, objektivat e goditura përfshinin një kompleks ushtarak ku ndodhet pallati presidencial, dy termocentrale dhe një depo karburanti. Ushtria thekson se sulmet ishin një përgjigje ndaj “sulmeve të përsëritura nga regjimi terrorist Huthi kundër Shtetit të Izraelit dhe civilëve të tij”, përfshirë lëshimin e raketave tokë-tokë dhe dronëve në drejtim të territorit izraelit ditët e fundit. Rebelët Huthi i kanë përshkruar veprimet e tyre si një akt solidariteti me popullin palestinez, në mes të konfliktit të zgjatur në Rripin e Gazës.

NETANYAHU THOTË SE IZRAELI MUND TË TËRHIQET NGA LIBANI, NËSE HEZBOLLAHU ÇARMATOSET

Kryeministri i Izraelit, Benjamin Netanyahu, tha se e ka mirëpritur “vendimin historik” të kabinetit libanez në fillim të këtij muaji për të punuar drejt çarmatosjes së Hezbollahut deri në fund të vitit 2025, dhe se ky vendim mund të çojë në tërheqjen e trupave izraelite nga vendi.  Ai tha se, nëse Libani i ndërmerr hapat e nevojshëm për ta çarmatosur Hezbollahun, atëherë Izraeli do të përgjigjet me masa të ndërsjella, duke përfshirë zvogëlimin dalëngadalë të pranisë ushtarake të Izraelit në Libanin jugor. Që nga përfundimi i luftës mes Izraelit dhe Hezbollahut në nëntor falë një armëpushimi të ndërmjetësuar nga Shtetet e Bashkuara, zyrtarët e Hezbollahut kanë thënë se grupi nuk do të diskutojë për çarmatimin e tij derisa Izraeli të tërhiqet nga pesë kodra që kontrollon brenda Libanit dhe t’i ndalë sulmet ajrore pothuajse të përditshme që kanë vrarë ose plagosur qindra njerëz, shumica prej tyre anëtarë të Hezbollahut.

ZELENSKY ENDE I CILËSON BISEDIMET DIREKTE ME PUTININ SI MËNYRËN MË EFEKTIVE PËR TË ARRITUR PAQE

Presidenti i Ukrainës, Volodymyr Zelensky, tha se një takim me presidentin e Rusisë, Vladimir Putin, do të ishte “rruga më efektive përpara”, pavarësisht përpjekjeve të ngecura për t’i dhënë fund luftës dhe sulmeve të vazhdueshme me dronë nga të dyja palët. Zelensky, duke folur të dielën në një ceremoni për të shënuar Ditën e Pavarësisë së vendit, u zotua se do “ta shtyjë Rusinë drejt paqes”. Gjenerali më i lartë i Kievit tha të dielën se trupat ukrainase kanë rimarrë tri fshatra në rajonin e Donjeckut. Njëkohësisht, Ukraina nisi sulme me dronë ndaj Rusisë, duke shkaktuar një zjarr në një termocentral bërthamor që u shua shpejt të dielën. Kryebashkiaku i Moskës, Sergei Sobyanin, tha të hënën në mëngjes se njësitë e mbrojtjes ajrore ruse shkatërruan dy dronë që po fluturonin drejt kryeqytetit rus.

IRANI NIS NESËR NË GJENEVË BISEDIMET BËRTHAMORE ME FRANCËN, BRITANINË DHE GJERMANINË                                           

Irani nesër do të rifillojë bisedimet mbi programin e tij bërthamor në Gjenevë me Francën , Britaninë dhe Gjermaninë , tre nga nënshkrueset e marrëveshjes së vitit 2015 me Teheranin që synonte frenimin e aktiviteteve të tij bërthamore, të cilat kërcënojnë të rivendosin sanksionet ndaj Iranit, raportoi televizioni shtetëror iranian.  “Ky raund i ri negociatash”, pas atij të mëparshëm të mbajtur në Stamboll, Turqi, në korrik, do të mbahet “në nivelin e zëvendësministrave të jashtëm në Gjenevë”, raportoi televizioni shtetëror. Irani do të përfaqësohet nga Majid Takht-Ravanchi, sipas agjencisë iraniane të lajmeve Tasnim. Vendndodhja e negociatave të reja nuk është specifikuar ende. Franca, Britania dhe Gjermania, si dhe Kina, Rusia dhe Shtetet e Bashkuara, kishin përfunduar një marrëveshje të vitit 2015 me Iranin, e cila parashikonte kufizime të konsiderueshme në programin e tij bërthamor në këmbim të heqjes graduale të sanksioneve të OKB-së.

DIELL E RË, DERI NË 32

Sot ishte mot kryesisht me diell, në pjesët kontinentale me vranësira mesatare. Frynë erë e lehtë nga drejtime të jugut. Temperaturat në ora 14 u shënuan; H. Novi 31, Podgoricë 30, Budvë e Ulqin 29, Tivar 28, Nikshiq 27, Cetinë e B. Pole 25, Andrievicë e Beran 24, Shavnik Rozhaj e Guci 23, Plevle 22, Kollashin 20, dhe në Zhablak 18 gradë.

Për nesër meteorologët paralajmërojnë mot të ngjashëm me sot. Kryesisht me diell, vende vende me vranësira mesatare. Do të fryjë erë e lehtë nga drejtime të ndryshme. Temperatura e mëngjesit prej 6 deri në 21, kurse më e larta e ditës prej 22 deri në 32 gradë.