Ditari 01.09.2025

Përgatiti, Musa Gjoka

FILLOJ VITI I RI SHKOLLOR ME GREVË PARALAJMËRUESE

Viti i ri shkollor 2025/2026 filloi sot për rreth 97,000 nxënës dhe do të përfundojë më 12 qershor. Sipas kalendarit shkollor, nxënësit e klasave të katërta të shkollave të mesme dhe të shkollave fillore do të shkojnë në pushim më 19 maj. Semestri i parë do të mbyllet më 26 dhjetor, ndërsa pushimi dimëror do të fillojë më 27 dhjetor. Semestri i dytë fillon më 19 janar dhe përfundon më 12 qershor, përveç për nxënësit e klasave të katërta, për të cilët do të përfundojë më 19 maj. Kryetari i Sindikatës së Arsimit, Radomir Bozhoviq, njoftoi se në shumicën e shkollave të Malit të Zi do të mbahet një grevë paralajmëruese, për shkak se përmes llogaritjes qendrore të pagave, mësuesve u janë ulur deri në 50 euro e për disa edhe më shumë. Sipas tij, greva paralajmëruese do të organizohet në mënyrë që të mos pengohet zhvillimi i mësimit. Kjo do të thotë se mësuesit do të mbajnë një tubim pas orarit të mësimit, ku do të diskutojnë për problemin aktual. Bozhoviq theksoi se me këtë veprim synojnë të tërheqin vëmendjen e autoriteteve që duhet të respektojnë rregullat dhe që paga e tyre është ulur në mënyrë të papajtueshme me aktet ligjore. Sindikalistët shpallën se pas kësaj do t'u japin autoriteteve një afat prej 15 ditësh për të korrigjuar llogaritjen e pagave në mënyrë që askujt të mos iu ulet paga.

SPAJIQ: POZITA E PUNONJËSVE NË ARSIMIN DO TË PËRMIRËSOHET NË PËRPUTHJE ME LIGJIN

Qeveria do të jetë e angazhuar në mënyrë të qëndrueshme dhe të përgjegjshme, në përputhje me ligjin, për përmirësimin e pozitës së punonjësve në arsim- duke krijuar një mjedis inkurajues për punë, tha kryeministri Millojko Spajiq në një postim me rastin e 1 shtatorit – fillimit të vitit shkollor 2025/26. Kryeministri u uroi nxënësve dhe studentëve që ditët që vijnë të jenë një thesar i kujtimeve dhe njohurive më të bukura që do t’i udhëheqin me sukses në jetë, dhe tha se është krenar që me politikën përgjegjëse janë siguruar libra falas për të gjithë nxënësit, shtesat për të gjithë fëmijët dhe bursa dhe kredi për studentët.
"Fillim të mbarë në vitin e ri shkollor për të gjithë nxënësit dhe mësuesit, si dhe për të gjithë punonjësit në sistemin arsimor. Sidomos për nxënësit tanë fillestar dhe prindërit e tyre", përfundoi Spajiq.

KAPITULLI 23 TË MBYLLET DERI NË FUND TË VITIT 2026

Prioriteti më i rëndësishëm strategjik dhe qëllimi i politikës së jashtme të Qeverisë së Malit të Zi është anëtarësimi i plotë i Malit të Zi në BE deri në vitin 2028. Sipas kësaj, është planifikuar mbyllja e të gjitha kapitujve të negociatave, deri në fund të vitit 2026, duke përfshirë kapitullin më të rëndësishëm të negociatave, Kapitulli 23 (drejtësia dhe të drejtat themelore), njoftuan nga Qeveria. Kjo është theksuar në Platformën për vizitën e ministrit të Drejtësisë, Bojan Bozhoviq, në Bruksel. Siç është njoftuar nga Qeveria, ministri do të vizitojë Brukselin sot dhe nesër. Është planifikuar që Bozhoviq të takohet me drejtorin e Përgjithshëm të Drejtorisë së Përgjithshme për politikën e fqinjësisë dhe negociatat e zgjerimit, Gert Jan Kopman, dhe me raportuesin e Parlamentit Evropian për Malin e Zi, Marjan Sharec. Përveç takimeve të përmendura, ministri do të zhvillojë takime me bashkëbiseduesit në nivelin e duhur, sipas propozimit të Misionit të Malit të Zi pranë BE-së. Pas marrjes së Raportit pozitiv për përmbushjen e kushteve të përkohshme (IBAR) si dhe kushteve përfundimtare për kapitullin 23 dhe kapitullin 24, po punohet me dinamikë të shpejtë për plotësimin e tyre", njoftuan nga Qeveria.

MUJOVIQ: NËSE MENDIMI I AGJENCISË ËSHTË NEGATIV, HEQIM DORË NGA NDËRTIMI I KOLEKTORIT

Kryebashkiaku i Podgoricës, Sasha Mujoviq, theksoi se deri në fund të shtatorit pritet mendimi i Agjencisë për Mbrojtjen e Mjedisit për ndërtimin e kolektorit në Botun, dhe nëse ai mendim është negativ, do të heqim dorë nga ndërtimi. Ai në emisionin “Link” tha se për të është e rëndësishme që mendimi të jetë i bazuar, por nëse ai është pozitiv, nuk sheh arsye për të hequr dorë nga projekti. Ai theksoi se për të është shumë me rëndësi të dihet nëse ky projekt është i rrezikshëm dhe në çfarë mase. Ai u propozoi banorëve të Botunit që, nëse nuk kanë besim tek Agjencia, të angazhojnë vetë një vlerësues të pavarur nga jashtë dhe se edhe ai mendim do të merret parasysh. "Nëse ndonjë studim tregon se është i dëmshëm, nuk do të bëj asgjë që bie ndesh me ndërgjegjen time dhe me vullnetin e banorëve të Botunit", tha kryetari i qytetit. Mujoviq theksoi se është i gatshëm për dialog me banorët e Botunit rreth ndërtimit të kolektorit, por se shëndeti i qytetarëve, i cili është në masë të madhe i rrezikuar, është prioritet.

SËMUNDJA LEGIONARE: KONFIRMOHET INFEKTIMI TE NJË PERSON NË MALIN E ZI

Sëmundja legionare, një formë e rëndë e pneumonisë që shkaktohet nga bakteria Legionella, është regjistruar këtë verë tek një person në Malin e Zi. Këtë e konfirmuan për "Vijesti" nga Qendra Klinike e Malit të Zi dhe Instituti i Shëndetit Publik, pas disa pyetjeve nga qytetarët rreth shfaqjes dhe përhapjes së kësaj baktere. Nga Instituti shpjeguan se bakteri Legionella është shumë e përhapur në natyrë dhe mund të gjendet në lumenj, liqene dhe ujëra të qëndrueshme, nga ku mund të kalojë në rezervuarët artificialë (sistemet e ndryshme të ujësjellësve, kullat e ftohjes, pishina masazhuese dhe fontanat dekorative). "Bakteria arrin në trupin e njeriut përmes thithjes së pikave mikroskopike të uji që përmbajnë bakterjen. Temperatura ideale e ujit për mbajtjen e Legionella-s në sistemet e ujit është midis 20°C dhe 50°C", thuhet në përgjigjen e Institutit. Ata theksuan se janë në rrezik më të madh për zhvillimin e një forme të rëndë të sëmundjes individët me sëmundje kronike, ata me imunitet të dobësuar, duhanpirësit dhe popullata e moshuar.

NË MUNGESË KUORUMI DËSHTON MBLEDHJA E KRYESISË SË KUVENDIT

Mbledhja e Kryesisë së Kuvendit të Kosovës, e thirrur për sot nga kryetari i Kuvendit, Dimal Basha, nuk u mbajt, për shkak të mungesës së kuorumit. Të pranishëm, përveç Bashës, ishin dy nënkryetare: Albulena Haxhiu nga Lëvizja Vetëvendosje dhe Emilja Rexhepi nga partitë joserbe, por munguan ata të Partisë Demokratike të Kosovës dhe Lidhjes Demokratike të Kosovës. Me rregulloren e punës së Kuvendit, mbledhja zhvillohet kur janë të pranishëm shumica e anëtarëve të Kryesisë. Nënkryetari i pestë nga komuniteti serb nuk është zgjedhur. Mbledhja e Kryesisë u thirr nga Basha - i cili e shpalli të përfunduar seancën konstituive pa nënkryetarin serb - për t'u konsultuar rreth vazhdimit të punës së institucionit. "Për mua nuk ka logjikë që të bllokohet Kuvendi i Republikës për mos zgjedhjen e një nënkryetari", përsëriti Basha sot.

SERBIA I BASHKOHET RUSISË DHE KINËS, VUÇIÇ DO TË TAKOHET ME PUTININ DHE XI-NË NË PEKIN

Presidenti i Serbisë, Aleksandar Vuçiq, do të takohet me presidentin e Republikës Popullore të Kinës, Xi Jinping, dhe me presidentin e Federatës Ruse, Vladimir Putin, gjatë vizitës së tij në Pekin nga data 2 deri më 4 shtator, bëri të ditur Presidenca e Serbisë. Në njoftim thuhet se Vuçiq do të bisedojë edhe me zyrtarë të tjerë të lartë kinezë dhe përfaqësues të kompanive të mëdha. Sipas njoftimit, ai viziton Kinën me ftesë të presidentit Xi Jinping dhe do të marrë pjesë edhe në ngjarjet përkujtimore me rastin e 80-vjetorit të fitores në Luftën e Dytë Botërore. Më 3 shtator, Kina do të mbajë një paradë ushtarake, për të shënuar dorëzimin zyrtar të Japonisë gjatë Luftës së Dytë Botërore. Autoritetet kineze konfirmuan pjesëmarrjen edhe të udhëheqësve të Koresë së Veriut, Bjellorusisë, Iranit, Kubës, Indonezisë, Mianmarit, Pakistanit dhe Malajzisë në mesin e të tjerëve. Siç transmeton Shërbimi i Ballkanit i Radios Evropa e Lirë, Vuçiq dhe Putin do të diskutojnë për bashkëpunimin ruso-serb, përfshirë sektorin e energjisë.

KALON MBI 800 NUMRI I TË VDEKURVE NGA TËRMETI NË AFGANISTAN

Mbi 800 njerëz humbën jetën dhe rreth 3.000 u plagosën nga një tërmet që goditi Afganistanin lindor, njoftuan sot autoritetet. Zëdhënësi i Qeverisë talibane, Zabiullah Mujahid, tha se rajoni më i prekur është provinca Kunar. Ekipet e shpëtimit vazhdojnë kërkimet për të mbijetuar mes rrënojave. Sipas raportimeve të para, vetëm në një fshat janë gjetur 30 viktima, por shifrat e sakta nuk janë mbledhur ende, pasi bëhet fjalë për një zonë të thellë malore me fshatra të shpërndarë. “Numri i viktimave dhe i të plagosurve është i lartë, por për shkak se zona është e vështirë për t’u arritur, ekipet tona janë ende në terren”, tha zëdhënësi i Ministrisë talibane të Shëndetësisë, Sharafat Zaman. Sipas raporteve, tre fshatra u shkatërruan plotësisht në provincën Kunar, ndërsa shumë të tjerë pësuan dëme të konsiderueshme.

PUTIN THOTË SE KISHTE “DAKORDËSI” ME TRUMPIN PËR PËRFUNDIMIN E LUFTËS NË UKRAINË

Presidenti rus, Vladimir Putin, tha se ka pasur “dakordësi” me presidentin amerikan, Donald Trump, për përfundimin e luftës në Ukrainë, gjatë takimit të tyre në Alaskë, muajin e kaluar. Megjithatë, ai nuk tha nëse do t'i pranonte bisedimet e paqes me presidentin ukrainas, Volodymyr Zelensky, të ndërmjetësuara nga Trump. Duke folur gjatë një samiti në Kinë, Putin vazhdoi të mbronte vendimin e tij për të pushtuar Ukrainën dhe fajësoi edhe një herë Perëndimin për luftën. Pas takimit në Alaskë, muajin e kaluar, i dërguari i posaçëm i SHBA-së, Steve Witkoff, tha se Putin ka rënë dakord për garancitë e sigurisë për Ukrainën - si pjesë e një marrëveshjeje të mundshme për paqe në të ardhmen - megjithëse Moska nuk e ka konfirmuar ende këtë. Putin foli në samitin e Organizatës së Bashkëpunimit të Shangait, ku u takua me udhëheqësin e Kinës, Xi Jinping, dhe atë të Indisë, Narendra Modi.

RAPORTOHET PËR DHJETËRA TË VRARË NË GAZË TEKSA IZRAELI E VRET ZËDHËNËSIN E HAMASIT

Izraeli tha dje se e ka vrarë një zëdhënës të Hamasit në Rripin e Gazës, ndërsa spitalet dhe dëshmitarët në të gjithë enklavën raportuan për dhjetëra palestinezë të vrarë nga bombardimet ajrore dhe të shtënat me armë. Ministri i Mbrojtjes së Izraelit, Israel Katz, konfirmoi se zëdhënësi i krahut të armatosur të Hamasit, Abu Obeida, u vra në Gazë gjatë fundjavës. Më herët, kryeministri i Izraelit, Benjamin Netanyahu, tha se ushtria izraelite e sulmoi Obeidan, por nuk e dinte nëse ai ishte vrarë. “Vërej që askush nga pala e Hamasit nuk po e trajton këtë çështje”, tha Netanyahu para ministrave në mbledhjen javore të kabinetit të tij. Hamasi është shpallur organizatë terroriste nga Shtetet e Bashkuara dhe Bashkimi Evropian. Obeida lëshoi deklaratë për herë të fundit të premten. Ndërkohë, të paktën 43 palestinezë janë vrarë që nga e shtuna, shumica në Qytetin e Gazës, sipas spitaleve lokale.

RUSIA GODET RRJETIN ENERGJETIK TË UKRAINËS, LË MIJËRA BANORË PA RRYMË

Rusia i ka vazhdar bombardimet e pamëshirshme kundër Ukrainës të dielën, duke i goditur objektet e energjisë në të paktën dy rajone dhe duke shënjestruar disa lokacione të tjera në të gjithë vendin. Sulmet me dronë dëmtuan katër objekte energjetike në rajonin e Odesës mëngjesin e së dielës, duke lënë pa rrymë më shumë se 29.000 banorë, tha në Telegram kreu rajonal Oleh Kiper. Kiper shtoi se sulmet ruse dëmtuan gjithashtu shtëpi private dhe ndërtesa të tjera dhe se një person u plagos. “Infrastruktura kritike po furnizohet përmes gjeneratorëve”, tha Kiper, duke shtuar se qyteti bregdetar Çernomorsk, në jug të Odesës, u godit më së rëndi. Një sulm me dronë disa orë më vonë goditi infrastrukturën civile energjetike në rajonin e Çernihivit në Ukrainën veriore, duke lënë pa energji elektrike 30.000 familje në qarkun Nizhin, tha guvernatori rajonal Vjacheslav Chaus. Ai tha se furnizimi me rrymë është rikthyer për spitalin kryesor dhe sistemin e ujit të qytetit.

KTHJELLËT DHE NXEHTË, DERI NË 32 GRADË

Në Mal të Zi mban mot kryesisht me diell, vende vende me vranësira mesatare. Frynë erë e lehtë kryesisht nga drejtimet e jugut. Temperaturat në ora 14 u shënuan; Danillovgrad 31, Podgoricë e H. Novi 28, Budvë Tivar e Ulqin 27, Tivat, Nikshiq e B. Polje 26, Beran, Kollashin, Plevle, Andrijevicë e Shavnik 25, Rozhajë e Guci 24, Petnicë 23 dhe në Zhablak 20 gradë.
Për nesër meteorologët paralajmërojnë në orët e mëngjesit mot të vranët vende vende. Gjatë ditës kthjellët dhe nxehtë, kurse në orët e mbrëmjes dhe gjatë natës vranësira gradual. Do të fryjë erë e lehtë deri e mesme kryesisht e jugut dhe juglindjes. Temperatura e mëngjesit prej 8 deri 19, kurse më e larta e ditës prej 24 deri në 32 gradë.