Ditari 23.10.2025

Ditarin e përgatiti Marash Dedvukaj

Kuvendi i Malit të Zi ka vazhdua punën me çrast deputetët kanë diskutuar lidhur me  raportin mbi punën e Këshillit të Prokurorisë dhe Prokurorisë së Shtetit për vitin e kaluar

Kuvendi i Malit të Zi ka vazhdua punën me çrast deputetët kanë diskutuar lidhur me  raportin mbi punën e Këshillit të Prokurorisë dhe Prokurorisë së Shtetit për vitin e kaluar. Raporti nuk mori mbështetje më herët sot në Komisionin për Drejtësi, Sistemin Politik dhe Administratë. Deputetët  do të diskutojnë gjithashtu Raportin Vjetor mbi punën e Këshillit Gjyqësor dhe situatën e përgjithshme në gjyqësor për vitin 2024. Bordi e pranoi këtë raport. Në rend të ditës është ri-vendimi për Ligjin për Ndryshimet në Ligjin për Tatimin mbi Pasurinë e Paluajtshme, pastaj Propozim Ligji për Ndryshimet në Ligjin për Kujdesin Shëndetësor, si dhe Propozim Ligji për Arsimin e Lartë. Prokurori i Lartë i Shtetit Millorad Markoviq tha në fillim të seancës se rezultatet e ndjekjes penale për vitin 2024 tregojnë se sistemi është i qëndrueshëm, profesional dhe synon përparim të mëtejshëm. Ai tha se reformat e zbatuara hodhën themelet për modernizimin dhe transparencën e punës. "Jemi të vetëdijshëm për dobësitë, të cilat kërkojnë veprim të përbashkët dhe mbështetjen e të gjitha institucioneve. Qëllimi ynë përfundimtar mbetet i qartë - një prokurori efikase, e pavarur dhe transparente që vepron ekskluzivisht në përputhje me Kushtetutën, ligjet dhe interesat e qytetarëve", pohon Markoviq. Deputetja e Evropia tani, Jelena Nedoviq, tha se qytetarët e dinë se ka nga ata që qëndrojnë në paraburgim për muaj të tërë, dhe disa po presin lirisht vendimet e gjykatës. "Qytetarët nuk kërkojnë mëshirë, por drejtësi, ata janë të etur për drejtësi", tha Nedoviq.

Spajiq dhe F. Mertz - Mali i Zi po bën përparim të konsiderueshëm në rrugën e tij evropiane

Mali i Zi po bën përparim të konsiderueshëm në rrugën e tij evropiane dhe është jashtëzakonisht e rëndësishme të vazhdohet me këtë ritëm në mënyrë që të anëtarësohet ekonomikisht në Bashkimin Evropian, tha kancelari gjerman Friedrich Mertz gjatë një takimi në Londër me kryeministrin e Malit të Zi Millojko Spajiq. Të dy zyrtarët, siç thanë ata, diskutuan integrimin evropian të Malit të Zi dhe rezultatet e arritura nga Qeveria e 44-të në rrugën e saj drejt BE-së. "U theksua se Mali i Zi ka mbështetjen e fortë të Gjermanisë dhe se në fazën tjetër të procesit të pranimit në Bashkim, kryesimi malazez i procesit të Berlinit vitin e ardhshëm do të jetë me rëndësi të veçantë", thanë ata në njoftim. Kjo, siç u theksua gjatë takimit, do të jetë me rëndësi të madhe për përmirësimin e bashkëpunimit midis Bashkimit Evropian dhe Ballkanit Perëndimor. Kryeministri Spajiq paraqiti një plan ambicioz reformash, i cili do t'i mundësojë Malit të Zi të mbyllë të gjithë kapitujt e negociatave deri në fund të vitit 2026 dhe t'i bashkohet Bashkimit dy vjet më vonë. "Theks i veçantë i vihet thellimit të bashkëpunimit ekonomik, forcimit të lidhjeve të investimeve dhe hapjes së mundësive të reja për investitorët gjermanë në Mal të Zi, veçanërisht në fushat e energjisë, turizmit dhe transformimit dixhital", theksohet në kumtesën nga Qeveria e Malit të Zi.

Pranimi i Malit të Zi në Bashkimin Evropian do të ishte një mënyrë me rrezik të ulët por me ndikim të lartë në BE

Pranimi i Malit të Zi në Bashkimin Evropian do të ishte një mënyrë me rrezik të ulët, por me ndikim të lartë që BE-ja të provojë besueshmërinë dhe aftësinë e saj për të zbatuar procesin e zgjerimit, thotë analiza e  Qendrës të Politikave Evropiane, duke shtuar se midis kandidatëve aktualë, Mali i Zi ofron mundësinë më të qartë për ta kthyer retorikën në përparim të prekshëm. Duke investuar kapitalin e nevojshëm politik dhe teknik për të mundësuar pranimin e vendit në Bashkim deri në vitin 2029, BE-ja do të tregonte se është gati të dalë nga zona e vetë e rehatisë, të respektojë premtimet e saj dhe të veprojë me vendosmëri, sipas analizës së Qendrës së Politikave Evropiane. Siç shtojnë ata, çdo pikë kthese - nga Tregu i Përbashkët te Bashkimi Monetar dhe zgjerimet e njëpasnjëshme – kanë kërkua imagjinatë dhe guxim politik. Zgjerimi zë një vend të veçantë në kuadrin më të gjerë të integrimit evropian. Ai ka shërbyer prej kohësh si një mekanizëm përmes të cilit stabiliteti i brendshëm dhe transformimi i jashtëm përforcohen reciprokisht."Në dy dekadat që i paraprinë luftës së Rusisë kundër Ukrainës, procesi i zgjerimit ngeci. Hezitimi politik midis shteteve anëtare shpesh anashkaloi angazhimet e ndërmarra ndaj vendeve kandidate. Pushtimi i plotë i Ukrainës nga Rusia në vitin 2022 rizgjoi dimensionin gjeopolitik të zgjerimit dhe angazhimin e rinovuar me Ballkanin Perëndimor. Ndër kandidatët aktualë, Mali i Zi ofron mundësinë më të qartë për ta kthyer retorikën në përparim të prekshëm", deklarojnë ata në analizë.Derisa mënyra se si do të përgjigjet BE-ja do të formësojë jo vetëm të ardhmen e Malit të Zi, por edhe të ardhmen e Ballkanit Perëndimor në tërësi, besueshmërinë e politikës së zgjerimit dhe aftësinë e Unionit për të demonstruar lidership në përputhje me përgjegjësitë e tij globale, pohojnë nga Qendra e politikave Evropiane.

Bozhoviq - Mal të Zi do të futet një vepër e re penale që lidhet me pasurimin e paligjshëm të zyrtarëve publikë

Ministri i Drejtësisë Bojan Bozhoviq njoftoi në një intervistë për Portalin RTMZ se në Mal të Zi do të futet një vepër e re penale që lidhet me pasurimin e paligjshëm të zyrtarëve publikë. "Konfirmoj se do të prezantojmë një vepër të re penale që lidhet me pasurimin e paligjshëm të zyrtarëve publikë. Është e mundur që fushëveprimi i kësaj vepre penale të jetë më i gjerë  dhe për momentin ky është qëllimi. Thjesht, ne e shohim luftën kundër krimit të organizuar dhe korrupsionit të lidhur me të në një nivel të lartë si përparësi", tha Bozhoviq. Siç shpjegoi ai, qëllimi përcaktohet si një element subjektiv i ekzistencës së një vepre penale. "Shkurt, ndryshimi në Kodin Penal do të përbëhej nga një nen që përcakton aktet e kryerjes së një vepre penale me një normë të përgjithshme (dispozitë e përgjithshme), dhe në përputhje me Konventën e OKB-së për Luftimin e Korrupsionit  ku qëllimi përshkruhet si një element subjektiv i ekzistencës së një vepre penale, dhe shuma e përfitimit pasuror përcaktohet në formë bazë dhe të kualifikuar, si një vijë ndarëse midis përgjegjësisë së kundërvajtjes dhe përgjegjësisë penale. Prandaj, referenca kryesore i referohet Ligjit për Parandalimin e Korrupsionit, i cili rregullon çështjet e sponsorizimit, dhurimit, papajtueshmërisë së funksioneve, raporteve mbi pasuritë, etj. Në këtë mënyrë, së bashku me ndryshimin e Ligjit për Konfiskimin e Përfitimeve Pasurore nga Aktiviteti Kriminal, po ndërtojmë një sistem të fortë që do t'i japë një shtytje luftës kundër krimit të organizuar dhe korrupsionit", tha Bozhoviq.

Gjukanoviq, theksoi se gjithçka ishte bërë sipas ligjit në zëvendësimin e drejtorit Ivan Bullatoviq

Kryetari i Bordit të Drejtorëve të Ndermarrjes Energjetike të Malit të Zi, Millutin Gjukanoviq, theksoi se gjithçka ishte bërë sipas ligjit në zëvendësimin e drejtorit Ivan Bullatoviq. Ai mbështeti shkarkimin e tij, edhe pse mendonte se kishte bërë një punë të mirë, sepse shumica e anëtarëve ishin në favor të ndryshimeve, dhe me qëllim arritjen e unitetit më të madh të mundshëm në Bord, i cili është thelbësor për funksionimin e këtij sistemi. Gjukanoviq theksoi në emisionin "Link" se vendimi për shkarkimin e Bullatoviqit nuk u mor me nxitim dhe se është  diskutua për një periudhë të gjatë kohore. Iniciativa u paraqit nga katër anëtarë të Bordit dhe se ai, si kryetar, votoi gjithashtu për të, sepse shumica ishte në favor të shkarkimit të tij, me qëllim arritjen e unitetit më të madh të mundshëm, gjë që është jashtëzakonisht e rëndësishme për zhvillimin e kompanisë. "Sipas mendimit tim, Ivan Bullatoviq punoi shumë mirë, por shumica mendoi se nevojiteshin disa ndryshime dhe unë votova  për shkarkimin e tij. Mendoj se u bë sipas ligjit, të gjithë kanë të drejtë ta kontestojnë atë, por Ndermarrja Energjetike e Malit të Zi duhet të merret me investimet dhe të përpiqet ta bëjë energjinë elektrike sa më të lirë të jetë e mundur", tha Gjukanoviq.Lidhur me deklaratën e njërit prej anëtarëve të Bordit, Neven Goshoviq, se vendimi nuk është i ligjshëm, Gjukanoviq, megjithatë, shton se konkursi për një drejtor të ri do të shpallet sa më shpejt të jetë e mundur, ndoshta javën tjetër.

Çfarë ndodh nëse Kosova nuk e miraton në kohë buxhetin e vitit të ardhshëm?

Kosova ka hyrë në vitin 2025 e vetëdijshme që do të kishte zgjedhje parlamentare, por pa e ditur se çfarë do ta priste pas tyre. Sfidë në konstituim të Kuvendit, ankesa të njëpasnjëshme në Gjykatën Kushtetuese, Qeveri në detyrë me kompetenca të kufizuara, dhe rrezikim të fondeve të huaja në vlerë të qindra miliona eurove. Kur duket se s’ka ku shkon më keq, del çështja e buxhetit shtetëror për vitin e ardhshëm - i cili, sipas parashikimeve të Ministrisë së Financave, pritet të jetë rreth 3.5 miliardë euro. Për ish-ministrin e Ekonomisë, Haki Shatri, situata momentale është shumë shqetësuese. “Buxheti është baza materiale e funksionimit të shtetit. Nëse i rrënohet kjo bazë, shteti falimenton, nuk mund të funksionojë”, thotë ai për Radion Evropa e Lirë. Për të mos arritur deri aty, buxheti duhet të kalojë nëpër disa faza, që të mund të hyjë në fuqi më 1 janar të vitit  2026. Kështu, deputetët i kanë dy muaj kohë, nga 1 nëntori deri më 31 dhjetor, që ta shqyrtojnë dokumentin në dy lexime, në komisione, dhe t’i bëjnë ndryshimet e duhura. Por, problemi i parë tani është që Kosova ka Qeveri në detyrë me kompetenca të kufizuara. Në ligjin për Qeverinë nuk përmendet termi Qeveri në detyrë, por Qeveri në dorëheqje, e cila përkufizohet si qeveri që funksionon pas shpërndarjes së Kuvendit e deri në zgjedhjen e qeverisë së re.

Nëntë të plagosur në një sulm rus me dronë në Kiev

Një sulm me dronë rusë gjatë natës në Kiev ka plagosur nëntë njerëz dhe ka shkaktuar dëme në ndërtesa në gjithë qytetin, tha sot një zyrtar i lartë në kryeqytetin ukrainas. Tymur Tkachenko, kreu i administratës ushtarake të Kievit, theksoi se dhjetë zona të qytetit kanë pësuar dëme, dhe se dy ndërtesa banimi u goditën drejtpërdrejt. Kryeqyteti ukrainas u përball me sulme ajrore nga Rusia për natën e dytë radhazi. Sulmet e mëparshme kishin si objektiv infrastrukturën energjetike, në atë që zyrtarët ukrainas e përshkruajnë si fushatë të Moskës për ta shkatërruar sistemin energjetik në prag të dimrit. Nuk është e qartë se cilat ishin shënjestrat e sulmit të fundit. Të paktën shtatë njerëz – gjashtë prej tyre në Kiev – janë vranë dje në sulmet në gjithë Ukrainën, të cilat gjithashtu shkaktuan ndërprerje të energjisë elektrike, thanë zyrtarët. Ushtria ukrainase njoftoi se Rusia i lëshoi 130 dronë në sulmet e fundit dhe se 92 prej tyre u rrëzuan. Ministria ruse e Mbrojtjes tha se kishte goditur infrastrukturën energjetike ukrainase në përgjigje të sulmeve ukrainase ndaj objektivave civile në Rusi. Moska thotë se objektet energjetike ukrainase janë objektiva të ligjshme ushtarake. Të dyja palët mohojnë se synojnë civilët. Ukraina gjithashtu ka kryer sulme me dronë ndaj Rusisë. Në sulmet e fundit të tilla, zyrtarët rusë thanë se një objekt energjetik në rajonin Nizhni Novgorod pësoi dëme të lehta dhe se një ndërmarrje e paidentifikuar ishte përfshirë nga zjarri në rajonin Riazan.

Brukseli mund t'i shfrytëzojë asetet ruse në vlera milionëshe si hua për Ukrainën

Udhëheqësit e Bashkimit Evropian do t’i kërkojnë sot Komisionit Evropian më ta përgatisë një propozim ligjor për t’i shfrytëzuar 176 miliardë euro të aseteve të ngrira shtetërore të Rusisë, në mënyrë që ta sigurojnë një hua për Ukrainën. Kjo hua do të mund ta mbulonte pjesën më të madhe të nevojave financiare të Kievit për tri vjetët e ardhshme. Diplomatët evropianë, të cilët folën me Radion Evropa e Lirë (REL), besojnë se ka mundësi të arrihet pajtueshmëri për të gjithë planin deri në fund të këtij viti dhe se plani do të ndihmojë në mbulimin e boshllëkut që pritet të lihet, nëse Shtetet e Bashkuara nuk janë më të gatshme ta financojnë Kievin në të njëjtën shkallë si më parë. Synimi nuk është të konfiskohen asetet ruse - të cilat mbahen kryesisht në kompaninë financiare Euroclear në Belgjikë - por të zëvendësohen me obligacione të lëshuara nga Komisioni Evropian dhe të mbështetura nga shtetet anëtare të BE-së e, mbase, edhe nga vendet e tjera të Grupit të Shtatëshes (G7) dhe partnerë të tjerë. Paratë do t’i jepen më pas Kievit gjatë viteve 2026-2028 si një “hua dëmshpërblimi”, të cilën Ukraina do të duhet ta shlyejë vetëm pasi Rusia të ketë paguar për dëmshpërblimet e luftës.

SHBA-ja godet me sanksione kompanitë ruse të naftës, BE-ja miraton pakon e re

Shtetet e Bashkuara kanë vendosë mbrëmë  vonë sanksione të reja që në shënjestër kanë dy kompanitë më të mëdha të naftës ruse – Rosneft dhe Lukoil – në përpjekje për t’i bërë trysni Moskës të ulet për të biseduar për arritjen e një marrëveshjeje për paqe në Ukrainë. Ky vendim erdhi pak pasi BE-ja e miratoi të paketën e 19-të të sanksioneve ndaj Moskës, të mërkurën, për luftën e saj kundër Ukrainës, e cila përfshin edhe ndalimin e importeve të gazit të lëngshëm natyral të Rusisë. Masat e Trumpit pasuan gjithashtu vendimin e Britanisë javën e kaluar për t’i sanksionuar Rosneftin dhe Lukoilin. “Sa herë që flas me presidentin rus Vladimirin, kemi biseda të mira, por ato nuk të shpien askund. Thjesht nuk shpien askund”, tha presidenti amerikan, Donald Trump, pas një takimi me shefin e NATO-s, Mark Rutte, me të cilin bisedoi lidhur me negociatat e paqes. Njoftimi për sanksionet erdhi një ditë pasi Trumpi njoftoi se takimi i planifikuar me presidentin rus, Vladimir Putin, në Budapest, do të shtyhej për kohë të papërcaktuar. Vetëm disa orë para sanksioneve, Rusia kreu bombardime të fuqishme mbi Ukrainë, duke i vrarë të paktën shtatë njerëz, përfshirë fëmijë. Departamenti amerikan i Thesarit tha se është i gatshëm të ndërmarrë masa të mëtejshme, duke i bërë thirrje Moskës ta pranojë menjëherë një armëpushim në luftën që nisi në shkurt të vitit 2022. “Duke pasur parasysh refuzimin e presidentit Putin për ta përfunduar këtë luftë të pakuptimtë, Thesari po sanksionon dy kompanitë më të mëdha të naftës në Rusi që financojnë makinerinë e luftës së Kremlinit”, tha sekretari i Thesarit, Scott Bessent.

Rubio: Lëvizjet e Izraelit për aneksimin e Bregut Perëndimor e rrezikojnë marrëveshjen për Gazën

Sekretari amerikan i Shtetit, Marco Rubio, e ka paralajmëruar Izraelin kundër aneksimit të Bregut të uzurpuar Perëndimor, duke thënë se hapat e ndërmarrë nga Parlamenti izraelit dhe dhuna e kolonëve po e rrezikojnë marrëveshjen e paqes për Rripin e Gazës. Ligjvënësit izraelitë kanë votuar për t’i çuar përpara dy projektligje që synojnë aneksimin e Bregut Perëndimor, vetëm një javë pasi presidenti amerikan, Donald Trump, e ndërmjetësoi një marrëveshje që synon t’i japë fund luftës dyvjeçare izraelite në Rripin e Gazës. “Mendoj se presidenti e ka bërë të qartë se kjo nuk është diçka që mund ta mbështesim tani për tani”, tha Rubio në lidhje me aneksimin, teksa qëndron  për një vizitë në Izrael. Lëvizjet për aneksim “janë kërcënuese për marrëveshjen e paqes”, u tha ai gazetarëve. “Ata janë demokraci, ata do të votojnë dhe njerëzit do të marrin qëndrime. I pyetur për dhunën në rritje të kolonëve ekstremistë izraelitë kundër palestinezëve në Bregun Perëndimor, Rubio u përgjigj: “Jemi të shqetësuar për gjithçka që mund ta destabilizojë atë për të cilën kemi punuar”. Megjithatë, Rubio shprehu optimizëm të përgjithshëm për ruajtjen e marrëveshjes së paqes. “Çdo ditë do të ketë kërcënime ndaj saj, por, në fakt, mendoj se jemi para afatit sa i përket zbatimit të marrëveshjes, dhe fakti që e kaluam këtë fundjavë është një shenjë e mirë”, tha Rubio. Shtetet e Bashkuara janë mbështetësi kryesor ushtarak dhe diplomatik i Izraelit, dhe Rubio deri së fundmi ishte përmbajtur nga kritikat ndaj përpjekjeve për aneksim të mbështetura nga aleatët e ekstremit të djathtë të kryeministrit Benjamin Netanyahu. Por, disa shtete arabe dhe islame, të cilat Shtetet e Bashkuara po përpiqen t’i angazhojnë për të ofruar trupa dhe fonde për një forcë stabilizimi në Gazë, kanë paralajmëruar se aneksimi i Bregut Perëndimor – i cili drejtohet nga Autoriteti Palestinez - është vijë e kuqe.

Nesër mot i ndryshueshëm

Sot në Mal të Zi ka mbajtë mot kryesisht i vranët dhe vende vende me reshje të shiut.Frynë erë e dobët deri e mesme nga drejtimi i jugut. Temperaturat në orën 14: Tivar 23 gradë,Ulqin 22, Beranë e Rozhajë 21, Budvë 20, Plevle, H.Novi e Andrievicë 19, Podgoricë 18, Petnicë 17,Plluzhinë e Guci 16,Cetinë e Shavnik 14, Nikshiq e Kollashin 13 dhe në Zhablak 11 gradë.

                Për nesër në mëngjes, metereologët parashohin të mbajë mot kryesisht i vranët dhe me reshje të shiut e bubullimë, kurse në orët e pasditës mot me vranësira të ndryshueshme dhe me intervale me diell. Do të fryjë erë e mesme deri e fortë e vende vende shumë e fortë nga drejtimi i jugut. Temperatura e mëngjesit do të sillet prej 6 deri në 17 kurse më e larta e ditës prej 11 deri në 22 gc.