L.V.

NBA

Klivlend ne zna za poraz: Preokretom arhiviran i Bruklin, ali prekinut rekordni niz od 110 poena po meču

Košarkaši Klivlend Kavalirsa i dalje ne znaju za poraz u NBA ligi nakon što su slavili kao domaćini i protiv Bruklin Netsa 105:100.

Ekipa iz Ohaja je postala tek 12. tim u istoriji NBA lige koji je počeo sezonu sa 11 pobjeda i bez poraza.

Momci Kenija Etkinsona su sinoć bili blizu toga da upišu prvi poraz pogotovo nakon što su neugodni gosti vodili na kraj treće dionice 82:68.

Međutim krenula je serija domaćih, koju je orkestrirao sjajni Darius Garlend i Kavsi su preokrenuli i ovaj meč i zadržali perfektan skor na startu sezone.

Ova pobjeda je bila važna upravo za Etkinsona, koji je u Bruklinu dobio otkaz 2020. godine (jedini posao prije Kavsa gdje je bio prvi trener), i ovo je njegov prvi susret sa njima od tada, budući da je radio kao asistent kod Stiva Kera u međuvremenu.

Klivlend je sa druge strane prekinuo svoj niz u kojem su u deset utakmica postizali 110+ poena po meču, iako su postavili rekord NBA rekord star 64 godine.

Tada su Filadelfija Voriorsi (današnji Golden Stejt), predvođeni Viltom Čemberlenom imali niz od devet takvih utakmica u sezoni 1960/1961.

Kavsi u svojoj istoriji imaju tri puta tokom sezona niz od 13 pobjeda. Svaki od tih nizova je bio dok je dres tima nosio Lebron Džejms.

Sinoć Evan Mobli je imao odličan meč u reketu sa 23 poena i 16 skokova, i četiri ukradene lope. Mičel je ubacio 22, Garland je dao 20 uz šest asistencija.

Kod Bruklina Kamerun Džonson 23 poena, Kem Tomas i Denis Šruder po 22.