S.V.

Vučević: Ne znam kakvi su planovi Čikaga, ali imam još dosta da pružim u NBA ligi

Čikago je porazom od Majamija završio sezonu, a naš as Nikola Vučević poručio je da u nastavku karijere želi da napravi korak više u doigravanju najjače lige na svijetu.

Nije siguran kakvi su planovi Bulsa za njega dok ulazi u posljednju sezonu ugovora. Ako je plan kluba da nastave da napreduju, onda će sa zadovoljstvom ostati u Čikagu.

Vučević je ove sezone na sedmom mjestu u NBA ligi po broju dabl-dabl učinaka. Ostvario ih je 45, uz 53 odsto šuta iz igre.

"Konstantnost je najteža stvar u ovoj ligi , uvijek ima uspona i padova. Moraš da naučiš da se nosiš s tim i ideš dalje. Samo pokušavam da svako veče dam svoj maksimum i ostanem dosljedan sebi. Ekipa ima puno potencijala, mladi smo, talentovani, ali ja uvijek želim da igramo na top nivou", istakao je Vučević.

Kaže da nikada nije mogao da zamisli da će postati Ol-star igrač, ali da još uvijek nije rekao posljednju riječ u NBA ligi.

"Zahvalan sam za karijeru koju sam imao do sada - bolje je nego što sam mogao da zamislim kao klinac koji je sanjao NBA. Čak i kad sam ušao u ligu, nisam mislio da ću biti Ol-star ili jedan od boljih centara. Ali nisam tip koji se zadovoljava lako. Uvijek želim više. Iako sam imao dobru karijeru, mislim da imam još dosta da pružim", istakao je Vučević.

Osvrnuo se na to što ga kolege zovu "dabl-dabl mašinom"...

"Lijepo je to čuti, jer znači da ljudi poštuju ono što radiš. Znači da priznaju tvoju igru, i to uvijek prija. Znam da se nekad šale, ali i to mi prija", zaključio je Vučević.