Ivan Mijanović [ Dopisnik RTCG-a iz Brisela ]

Kos

"Mogli bismo da završimo pregovore sa Crnom Gorom do kraja 2026."

Kandidatkinja za komesarku za proširenje Marta Kos poručila je da će snažno raditi sa Crnom Gorom kako bi zemlja što prije privela kraju proces pregovora.

“Podržaću vaša nastojanja da učinite sve što je potrebno da dođete do kraja pregovaračkog procesa. Koliko će tada biti potrebno da vas zemlje članice uvedu u Evropsku uniju? To nije u mojim rukama, ali da, obavezujem se da ću raditi snažno sa Crnom Gorom. Radujem se što ću posjetiti vašu zemlju što je prije moguće”, kazala je Kos na pitanje TVCG nakon saslušanja pred Vanjskopolitičkim odborom Evropskog parlamenta.

Pred evropskim poslanicima, Kos je poručila da je proširenje proces zasnovan na zaslugama, i istakla da će učiniti sve što je u njenoj mogućnosti kako bi zemlje bile spremne za članstvo. Kazala je da danas, prvi put poslije deset godina, postoji realna šansa da jedna ili dvije zemlje stignu do kraja pregovaračkog procesa.

“Mogli bismo da završimo pregovore sa Crnom Gorom, da zatvorimo poglavlja do kraja 2026, sa Albanijom do kraja 2027. Čak je i gospodin Vučić rekao prije nekoliko dana kada je predstavljen izvještaj o proširenju da je spreman da učini sve da svoje zakonodavstvo uskladi sa evropskom pravnom tekovinom. Mislim da je ovo ogroman uspjeh. Ipak, djela moraju da uslijede, mislim je to takođe veoma važno. Rat u Ukrajini donio je novu dinamiku u procesu proširenja“, naglasila je Kos pred zastupnicima u Parlamentu.

Kos je naglasila da je proces proširenja maraton, a ne sprint. Poručila je da put proširenja mora ostati zasnovan na zaslugama, pri čemu se svaka zemlja koja teži pridruživanju EU detaljno procjenjuje na osnovu individualnih zasluga i da „ne postoje prečice“.

Ukoliko bude potvrđena za komesarku, Kos se obavezala da će obezbijediti da sve zemlje proširenja budu dobro pripremljene, podržane snažnom političkom podrškom EU i praćene tokom cijelog procesa. Takođe je kazala i da zemlje koje sprovode reforme takođe treba da imaju koristi, uključujući postepenu integraciju u jedinstveno tržište.

Jasno stavivši do znanja da će iskoristiti mogućnost korišćenja korektivih mjera u slučaju duge stagnacije ili nazadovanja, Kos je naglasila potrebu za snažnom evropskom posvećenošću zemlja kandidata.

Kandidatkinja za komesarku za proširenje poručuje i da proces proširenja treba da bude transparentan u pogledu trošenja novca – pod nadzorom namjenskih revizorskih struktura – i zasnovan na ispunjavanju relevantnih kriterijuma od strane zemalja kandidata.

Kos je istakla i da je na državama članicama EU konačna odluka o pristupanju neke zemlje, kao i da unutrašnje reforme EU treba da se odvijaju paralelno sa napredovanjem kandidata.

Kos dobila zeleno svjetlo Vanjskopolitičkog odbora EP

Kos je dobila zeleno svjetlo Odbora za vanjske poslove Evropskog parlamenta poslije današnjeg saslušanja, potvrđeno je iz političke grupe Obnovimo Evropu (Renew).

Na osnovu preporuka odbora, Konferencija predsjednika Evropskog parlamenta (predsjednica EP Metsola i predsjedavajući političkih grupa) treba da sprovedu konačnu procjenu i proglase saslušanja zatvorenim 21. novembra, nakon čega će sva evaluaciona pisma biti objavljena.

Izbor kolegijuma komesara od strane poslanika EP zakazan je za vrijeme plenarne sjednice od 25. do 28. novembra u Strazburu.