L.V.

Tragedija u Italiji: Golman Intera pregazio starca u invalidskim kolicima

U utorak ujutro, u italijanskom gradiću Fenegro, nedaleko od Koma, dogodila se teška saobraćajna nesreća u kojoj je učestvovao golman Intera, Žozep Martines.

Španski čuvar mreže, koji je ovog ljeta stigao u Milano iz Đirone, upravljao je svojim automobilom kada je, nešto prije 10 sati, pregazio 81-godišnjeg muškarca koji se kretao u električnim invalidskim kolicima. Udarac je bio koban - starac je preminuo na licu mjesta, uprkos brzoj intervenciji hitnih službi.

Na mjesto nesreće odmah su stigli helikopter iz Koma, vozilo Hitne pomoći Crvenog krsta iz Saronja i pripadnici karabinjera iz Kantuja, koji su započeli istragu kako bi utvrdili tačan tok događaja.

Martines, koji ima 27 godina, nije zadobio povrede, ali je bio u teškom psihičkom stanju i trenutno se nalazi pod nadzorom ljekara i klupskih psihologa.

Saobraćaj na putu gdje se dogodila nesreća bio je privremeno obustavljen tokom uviđaja i akcije spasavanja.

Ova tragična vijest potresla je čitavu italijansku javnost i fudbalsku zajednicu, dok se Inter još nije zvanično oglasio povodom incidenta.